काठमाडौं । सर्वाधिक रुपमा रुचाईएको नेपाली कथानक चलचित्र ‘बाटो मुनीको फूल’का अभिनेता तथा गायक यश कुमार अभिनीत तथा निर्देशित फिल्म ‘छिरिङ्ग’ को अफिसियल ट्रेलर सार्वजनिक भएको छ ।
आइतवार राजधानीमा एक कार्यक्रम गरेर ट्रेलर यूट्युबमा सार्वजनिक गरिएको हो । ट्रेलरमा प्रेम र द्वन्द्व देख्न सकिन्छ । यस चलचित्रले बहुपतिप्रथाको कथालाई उठाउन खोजेको छ । चलचित्रमा नव–नायिका कामना भुजेल र अभिनेता तथा गायक यश र निमा रुम्बाको अभिनय रहेको छ ।
सुनिल माथेमा प्रधान, आइबी दर्नाल र नवीन बुढाथोकीको निर्माण रहेको चलचित्रलाई यश कुमार र याम थापाले मिलेर लेखेका हुन् । यश कुमारको यो पहिलो निर्देशित चलचित्र हो ।
‘छिरिङ्ग’ मा मानकृष्ण महर्जनको छायांकन, चन्द्र पन्तको द्वन्द्व, कविराज गहतराजको कोरियोग्राफी, मिलन श्रेष्ठ र साहिल खानको सम्पादन छ । फिल्म आगामी असोज १२ गते देशव्यापी रिलिज हुनेछ ।
