काठमाडौँ,२० कात्तिक । अमेरिकी विदेशमन्त्री माइक पोम्पेओले बिहीबार उत्तर कोरियाली नेता किम जोङ उनका एकजना उच्चस्तरीय सैनिक अधिकारीसँग भेटवार्ता गर्ने कार्यक्रम रहेको बताइएको छ ।
अमेरिकी विदेश मन्त्रालयले दिएको जानकारीअनुसार उनले आगामी बिहीबार ती अधिकारीसँग भेटवार्ता गर्न लागेको जनाइएको छ । गएको जुन महिनामा सिंगापुरमा अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच भएको द्विपक्षीय उच्चस्तरीय भेटवार्तापछि विकसित यी दुई देशबीचको यो भेटलाई महत्वका साथ हेरिएको छ ।
उक्त सम्मेलनपछि यी दुई देशबीचको सम्बन्धमा सुधार आएको भए पनि पछिल्लो समयमा भने निशस्त्रीकरणका विषयमा विभिन्न कुराहरु आइरहेका छन् । अमेरिकी विदेशमन्त्री पोम्पेओसँग भेटवार्ता हुन लागेका उत्तर कोरियाली सैनिक अधिकारी कर्णेल किम योङ चोल हुन् । उनी उत्तर कोरियाली नेता उनका विश्वासपात्र मानिन्छन् ।
कोरियाली प्रायद्वीपमा निशस्त्रीकरणका लागि काम गर्ने सहमति अमेरिकी राष्ट्रपति ट्रम्प र उत्तर कोरियाली नेता उनबीच गन जुन १२ मा सिंगापुरमा सहमति भएको थियो । सो सहमतिपछि उत्तर कोरियाले परमाणु अस्त्रको उत्पादन नगरेको बताएको छ ।
तर पनि केही अमेरिकी अनुसन्धानहरुले भने उत्तर कोरियाली लुकिछिपी यहाँ परमाणु अस्त्र उत्पादन गर्ने गरेको बताएका छन् । सो कुरा उत्तर कोरियाले स्वीकार गरेको छैन ।
केही समयमात्र अघि उत्तर कोरियाको विदेश मन्त्रालयले नै यदि अमेरिकाले आफूमाथि लगाएका विविध नाकाबन्दीहरु नहटाउने हो भने आफूहरु परमाणु अस्त्र उत्पादन गर्न बाध्य हुने बताएको थियो । यस विषयमा अमेरिकाले कुनै जवाफ दिएको छैन । कोरियाली प्रायद्वीपमा शान्तिको आशा अझै नमरेको अभिव्यक्ति अमेरिकी राष्ट्रपति डोनाल्ड ट्रम्पले दिएका थिए । उनले हालैमात्र पनि आफू उत्तर कोरियासँग मिलेर काम गर्न इच्छुक रहेको बताएका थिए । बिहीबार हुन लागेको उत्तर कोरियाली सैन्य अधिकारी चोल र अमेरिकी विदेशमन्त्री पोम्पेओबीचको वार्तामा यस विषयमा कुराकानी हुने बताइएको छ ।
उक्त भेटवार्ता हुन लागेको विषयको पुष्टिगर्दै अमेरिकी विदेशमन्त्री पोम्पेओले यस भेटका क्रममा दुई देशबीचमा विगतमा भएका सहमतिहरुबारे उल्लेख्य प्रगति हुने धारणा राखेका छन । उनले गएको जुन महिनामा भएको सो उच्चस्तरीय भेटवार्तापछि भएका प्रगतिहरुको समीक्षाका लागि आगामी केही समयमा त्यस्तो अर्को उच्चस्तरीय भेटका लागि बिहीबार हुन लागेको भेटका क्रममा वातावरण निर्माण हुने अपेक्षा गरिएको जानकारी पनि उनले गराएका छन ।
उता एकदिन मात्र अघि पनि संयुक्तराज्य अमेरिका र दक्षिण कोरियाकाबीचमा संयुक्त सैन्य अभ्यास शुरु भएकोे अर्को एक समाचार आएको थियो । जुन महिनाको सो उच्चस्तरीय भेटावार्तापछि रोकिएको सो सैन्य अभ्यास रोकिएको थियो ।
दक्षिण कोरियाली अधिकारीहरुले दिएको जानकारीअनुसार सो सैन्य अभ्यास सोमबारबाटै शुरु भएको हो । दुई हप्तासम्म चल्ने र दक्षिण कोरियाको दक्षिणी शहर पोहाङमा जारी रहेको सो सैन्य अभ्यास सानो आकारको रहेको र त्यसमा ५०० सैनिक मात्र सहभागी हुनेछन् ।
उत्तर कोरियाले आपत्ति जनाएपछि पहिले सो सैनिक अभ्यास रोकिएको थियो । तर यस पटकको यस अभ्यासपछि भने उत्तर कोरियाको कुनै प्रतिक्रिया आएको छैन । एजेन्सी
