काठमाडौं, २३ मंसिर । शोभा बानियाँको प्रस्तुती रहेको आधुनिक गीति एल्वम् ‘अनुज’को विमोचन गरिएको छ । श्रुति संगीत विद्यालयको आयोजनामा गीति संग्रहको विमोचन गरिएको हो । गीति एल्वम् ‘अनुज’ मा संगीतकार सम्राट थापाको संगीत रहेको छ भने गीतकार मीन बानियाँको शब्द रचना रहेको छ।
गायक, संगीतकार एवम् श्रुती संगीतका प्रबन्ध निर्देशक नरहरी प्रेमीको सभापतित्व तथा वरिष्ठ गीतकार रत्न शमशेर थापाको प्रमुख आथित्यतामा गीति एल्वम् ‘अनुज’को विमोचन गरिएको हो ।
गीति एल्वममा आनन्द कार्की, सम्राट थापा, नरहरि प्रेमी, राम चन्द्र काफ्ले, दिपक लिम्बू , जिना रसाईली, सानू मैयाँ यादवको स्वर समेटिएको छ ।
कार्यक्रममा वरिष्ठ चलचित्र निर्देशकहरु दयाराम दाहाल, मदन घिमिरे, डा.तारालाल श्रेष्ठ, गायक आनन्द कार्की, पत्रकार रामकुमार एलन, प्रसिद्ध सङ्गीतकार सिके रसाईली लगायत कलाकार र पत्रकारहरूको सहभागिता रहेको थियो ।
