काठमाडौं, २८ फागुन । सहिद स्मारक ‘ए’ डिभिजन लिगमा आज (आइतबार) दुई हेभिवेट क्लब मछिन्द्र फुटबल क्लब र मनाङ मर्स्याङ्दी क्लब भिड्दै छन्।
लिगमा खराब सुरुवात गरेको मछिन्द्र पहिलो जितको खोजीमा छ। उता मनाङ भने अपराजित यात्रालाई कायम राख्ने योजनामा हुनेछ।
साविक विजेता मछिन्द्र लिगको पहिलो खेलमा जावलाखेल युथ क्लबसँग ३–१ ले हारेको थियो भने दोस्रो खेलमा त्रिभुवन आर्मी फुटबल क्लबसँग २–० ले हारेको थियो।
उता मनाङले भने दोस्रो खेलमा संकटा क्लबलाई १–० ले हराएको थियो। पहिलो खेल हिमालयन शेर्पासँग १–१ को बराबरी खेलेको थियो। ललितपुरको सातदोबाटोस्थित एन्फा कम्प्लेक्सको मैदानमा हुने खेल दिउँसो साढे २ बजेदेखि सुरु हुनेछ।
आजै हुने अर्को खेलमा न्युरोड टिम एनआरटी र त्रिभुवन आर्मी फुटबल क्लब भिड्नेछन्। च्यासल मैदानमा हुने खेल दिउँसो साढे २ बजे नै सुरु हुनेछ।
आर्मी एनआरटी हराउँदै अपराजित यात्रालाई निरन्तरता दिने योजनामा छ भने एनआरटी पहिलो जितको खोजीमा मैदान उत्रनेछ।
file photo
