काठमाडौं,५ वैशाख । एसीसी प्रिमियर कप अन्तर्गत मलेसियासँगको जारी खेलमा नेपालले तेस्रो विकेटको रुपमा कप्तान रोहितकुमार पौडेललाई गुमाएको छ ।
२१औं ओभरको पाँचौ बलमा मलेसियाका विरन्दीप सिंहले पौडेललाई क्याचआउट गरेका हुन् । रोहित ४३ बलको सामना गर्दै ४२ रन बनाएर आउट भएका हुन् । ताजा अवस्थामा नेपाल २४ ओभरमा तीन विकेटको क्षतिमा १२४ रन बनाएर खेलिरहेको छ । नेपालका लागि रोहित पौडेलले ४२,कुशल भुर्तेलले ३८ र आसिफ शेख ३ रन बनाएर बाहिरिए भने अहिले नेपालको क्रिजमा रहेका भीम सार्की ३३ र कुसल मल्ल २ रन बनाएर खेलिरहेका छन् ।
यसअघी कीर्तिपुरस्थित त्रिवि मैदानमा पहिले ब्याटिङगर्दै मलेसियाले पुरा ५० ओभर खेल्दै ९ विकेटको क्षतिमा २३५ रन बनाएर नेपाललाई २३६ रनको लक्ष्य प्रस्तुत गरेको थियो ।
मलेसियाको लागि अह्मद फइजले सर्वाधिक ७६ रन बनाए । ९५ बलको सामना गरेका फइजले १ छक्का र ८ चौकाको मद्दतले ७६ रन बनाएका हुन् । त्यस्तै विरन्दीप सिंहले ४६,मोह्मद अमिरले १७ तथा सेयद्द अजिजले १३ र भिजय उन्नीले १२ रनको योगदान गरे ।
मलेसियालाई मध्यमस्कोरमा समेट्न नेपालका लागी सोमपाल कामी र सन्दीप लामिछानेले तीन तीन तथा ललित राजवंशीले २ र गुल्सन झाले एक विकेट लिएका छन् ।
