एजेन्सी। पूर्वी अफ्रिकी देश केन्यामा प्रलयको दिनमा विश्वास राख्ने क्रिश्चियन सम्प्रदायका सयौँले सामूहिक ‘आत्महत्या’ गरेका छन्।
यस मामिलामा आत्महत्या गर्नेको संख्या २०० नाघेको छ। प्रहरीले सामूहिक आत्महत्या गरेकामध्ये २०१ जनाको शव निकालेको छ।
यो घटना भएको स्थानमा अझै ६ सयभन्दा धेरै हराइरहेको त्यहाँको प्रहरीले जनाएको छ।
प्रलयको दिनमा विश्वास गर्ने यस सम्प्रदायसँग सम्ब्धित व्यक्तिहरूले सुरुमा बालबालिकाहरुलाई भोकभोकै राखेर मारिएको बताएका छन्। उनीहरुमध्ये प्रहरीले यही शनिवार थप २२ जनाको शव भेट्टाएको छ।
‘हाम्रो फरेन्सिक टोलीले शनिबार २२ वटा शव निकालेको छ। यहाँ हामीले कसैलाई जीवित फेला पारेका छैनौँ’, स्थानीय आयुक्त रोडाह ओन्यान्चाले भनेका छन्।
केन्याको दक्षिण पश्चिमी क्षेत्रस्थित शाकाहोला जङ्गलमा क्रिश्चियन समुदायको सामूहिक आत्महत्याको घटना भएको हो। त्यहाँ प्रहरीले खोजीकार्य गरिरहेको छ।
केन्यास्थित यो समुदायका एक पास्टरले टाइम्स पत्रिकालाई बताएअनुसार सामूहिक आत्महत्याका धेरै चरणमा योजना बनाइएको थियो। आत्महत्याको योजना बनाएका यिनै पास्टरले प्रहरीलाई सघाइरहेका छन्।
उनका अनुसार सुरुमा बालबालिकालाई भोकै राखेर ज्यान लिइएको थियो। बालबालिकाको ज्यान लिएपछि महिलाले आत्महत्या गरे। अन्तिममा घरका पुरुषले पनि आत्महत्या गरे। त्यसपछि यो सम्प्रदायका अगुवा पास्टर पल म्याकेन्जीको परिवारले पनि आत्महत्या गरेका छन्।
यो प्रकरणमा योजना बनाउनेमध्ये पल म्याकेन्जी अहिले पक्राउ परेका छन्। उक्त जंगलबाट बरामद गरिएका केही शव प्रहरीले पोस्टमार्टम गरेको छ।
प्रहरीका अनुसार आत्महत्या गरेकाहरुमा भोक, श्वास फेर्न नसकेको र कुटपिट पनि भएकव विवरण संकलन गरेको छ।
