काठमाडौं,१४ जेठ । बागमती प्रदेशको आज नीति तथा कार्यक्रम प्रस्तुत गर्ने क्रममा प्रदेशसभामा रोचक दृष्य देखिइको छ ।
सभामुख भुवन पाठकले आर्थिक वर्ष २०८०-८१ को नीति तथा कार्यक्रम प्रस्तुत गर्न प्रदेश प्रमुख यादवचन्द्र शर्मालाई अनुमति दिएपछि नीति तथा कार्यक्रम वाचन गर्ने क्रममा प्रदेश प्रमुख केही समय अलमलमा परेका छन् ।
प्रदेश प्रमुख यादवचन्द्र शर्मालाई मुख्यमन्त्री शालिकराम जम्कट्टेलले रातो ‘कभर’भएको नीति तथा कार्यक्रमको फाइल पेश गरेका थिए । मुख्यमन्त्रीले पेश गरेको फाइल खोलेर पढ्न खोज्दा रित्तो पाएपछि शर्मा केहीबेर अलमलिए ।
मुख्यमन्त्रीतर्फ इसारा गर्दै उनले खाली फाइल देखाए । मुख्यमन्त्री जम्कट्टेल पुनः रोष्टममा पुगेर आफूसँग रहेको एक प्रति नीति तथा कार्यक्रमको कपी दिएपछि शर्माले वाचन सुरू गरे ।
यस्तो गथविधि नियालिरहेका प्रदेश सांसदहरु भने प्रदेश सरकारको लापरबाही भएको प्रतिक्रिया दिएका छन् ।
