काठमाडौं,८ साउन । कोशी प्रदेशका मुख्यमन्त्री उद्धव थापाको नियुक्तिविरुद्ध सर्वोच्च अदालतमा दायर रिटमाथि आजपनि सुनुवाईका लागि पेसी परेको छ ।
निवर्तमान मुख्यमन्त्री हिक्मतकुमार कार्कीले दायर गरेको उक्त रिटको पेसी सर्वोच्च अदालतका न्यायाधीशद्धय सुष्मालता माथेमा र तिलप्रसाद श्रेष्ठको संयुक्त इजलासमा परेको हो ।
गत असार २१ गते मुख्यमन्त्रीमा नियुक्त भएका थापाले माओवादी केन्द्रबाट निर्वाचित सभामुख बाबुराम गौतमको हस्ताक्षर प्रयोग गर्दै नियुक्त भएपछि उनको नियुक्ति असम्बैधानिक रहेको भन्दै एमाले नेता कार्की सर्वोच्च् गएका हुन् ।
सरकार गठनमा सभामुख बाबुराम गौतमको समेत हस्ताक्षर प्रयोग गरिएको भन्दै कार्कीले प्रदेश प्रमुख पर्शुराम खापुङ, मुख्यमन्त्री थापा र सभामुख गौतमलाई विपक्षी बनाएर रिट निवेदन दिएका हुन् । रिट निवेदनमा कार्कीले आफूलाई मुख्यमन्त्री नियुक्त गर्न परामादेशको मागसमेत गरेका छन् ।
कार्कीले दायर गरेको रिटमा सुनुवाई गर्दै गत असार २७ गते न्याधीश सपना मल्ल प्रधानको एकल इजलासले साउन ३ भित्र लिलिखत जवाफ पेस गरी साउन ७ गतेबाट निरन्तर सुनुवाई गर्ने फैसला गरेको थियो ।
यसअघि आइतबारपनि उक्त रिट न्यायाधीशद्धय कुमार रेग्मी र नहकुल सुवेदीको संयुक्त इजलासमा परेपनि हेर्न नमिल्नेमा परेको थियो ।
