काठमाडौं,१९ भदौ । काठमाडौं महानगरपालिका मेयर बालेन्द्र शाह उर्फ बालेन बेला-बेलामा चर्चामा आइरहन्छन् । गत वर्षको बैशाखमा सम्पन्न स्थानीय निकायको निर्वाचनमा काठमाडौं महानगरको प्रमुखमा स्वतन्त्र उम्मेदवारी दिएपछि चर्चामा आएका शाह शानदार मतसहित निर्वाचित भएपछि उनको चर्चा रातारात चुलिँदै गएको छ ।
उनै मेयर शाहले गत शनिबार साँझा सामाजिक सञ्जालमा लेखेको एउटा स्ट्याटसले यतिबेला उनको चर्चा र आलोचना दुबै भइरहेको छ । काठमाडौं महानगरपालिका जस्तो देशकै शक्तिशाली स्थानीय तहका मेयर शाहले आफ्नी पत्नी सविना काफ्ले सवार सरकारी गाडी कोटेश्वरमा प्रहरीले रोकेर केरकार गरेपछि आक्रोशित बनेका शाहले शनिबार राती ९ बजे सरकारलाई चोरको संज्ञा दिँदै भोलिबाट महानगरको गाडी रोकिएमा सिंहदरबार आगो लगाईदिने धम्की दिएका थिए । यद्दपि उक्त स्ट्याटस आइतबार रातीनै डिलिट भइसकेको छ ।
आफूले लेखेको स्ट्याटसले तीव्र आलोचना खेपेपछि हटाएर मेयर बालेन यतिबेला नेपाल र भारतबीच सोमबार भएको क्रिकेट हेर्न श्रीलंकामा छन् । तर उनले उक्त स्ट्याटसको पक्ष र विपक्षमा तीव्र बहस भईरहेको छ । उनको उक्त आक्रोशप्रति नेतादेखि कलाकार र हाकिमदेखि पियनसम्मले आ-आफ्नै तवरले मनलाग्दी तर्क गर्दै बहस गरिरहेका छन् । बहसमा उत्रिने एकाध राजनीतिज्ञबाहेकले समर्थन गरिरहेका छन् । सडकदेखि सदनसम्म प्रवेश पाएको बालेनको स्ट्याटसले संसदीय समितिमा पनि प्रवेश पाएको छ ।
मंगलबार बसेको संसदको उद्योग, वाणिज्य तथा श्रम र उपभोक्ता समितिको बैठकमा सांसदहरुले पक्ष र विपक्षमा आफ्नो धारणा राखेका छन् । आजको बैठकमा बोल्दै नेकपा एमालेकी सांसद अमृतादेवी अग्रहरीले बालेको आक्रोशलाई समर्थन गरेकी छन् । सांसद अग्रहरीले भन्सारबाट सय किलो सुन बाहिरिँदासमेत समात्न नसक्ने सरकार चारे नै भएको र बालेनले भनेको कुरा शतप्रतिशत सहि भएको बताएकी हुन् ।
“बालेनले चोर भनेको कुरा शतप्रतिशत सही छ, किनभने विमानस्थलबाट १०० किलो सुन छिर्छ,” सांसद अग्रहरीले समिति बैठकमा भनिन्, “जनता मारमा परेका छन्, तर सरकारलाई चासो छैन ।”
