काठमाडौं,२० भदौ । नेपाल पत्रकार महासंघले अनलाइनखबर डटकममा कार्यरत पत्रकार नमिता दाहालमाथि समाचार संकलनका क्रममा त्रिभुवन विमानस्थलमा भएको हातपात र दुर्व्यवहारको घटनाप्रति नेपाल गम्भीर ध्यानाकर्षण भएको जनाएको छ ।
महासंघका महासचिव रोसन पुरीले आज विज्ञप्ति जारी गर्दै एसिया कप क्रिकेट खेलेर फर्किएको नेपाली राष्ट्रिय क्रिकेट टोलीलाई आज दिउँसो त्रिभुवन विमानस्थलमा स्वागतका लागि आयोजना गरिएको कार्यक्रमको समाचार संकलनका क्रममा पत्रकार दाहालमाथि त्यहाँ उपस्थित केही व्यक्तिले ‘महिला भएर पनि यस्तो ठाउँमा किन आएको’ भन्दै हातपात र दुर्व्यवहार गरेको जनाएको छ ।
महासंघले स्वतन्त्रापूर्वक पेशागत धर्म निर्वाहमा जुटेका पत्रकारमाथि यस किसिमको हर्कत हुनु अत्यन्त निन्दनीय र प्रेस स्वतन्त्रताविरोधी काम भएको उल्लेख गरेको छ ।
महासंघले प्रेसविरोधी उक्त घटनाको छानबिन गरी दोषीलाई कानुनी दायरामा ल्याएर प्रेसको संवैधानिक स्वतन्त्रताको सम्मान गर्न सम्बन्धित निकायसँग मागसमेत गरेको छ ।
