काठमाडौं,१ फागुन । सत्तारुढ दल नेकपा माओवादी केन्द्रको विधान अधिवेशन सुरु भएको छ । काठमाडौंको कमलादीस्थित प्रज्ञा प्रतिष्ठानमा आज बिहान ११ बजेदेखि विधान सम्मेलन सुरू भएको छ । प्रधानमन्त्रीसमेत रहेका माओवादी केन्द्रका अधयक्ष पुष्पकमल दाहाल ‘प्रचण्ड’ ले २९औं जनयुद्ध दिवसको सन्दर्भमा २९ वटा बत्तिमा दीप प्रज्वलन गरेर विधान अधिवेशनको उद्घाटन गरेका छन् ।
तीन दिनसम्म चल्ने विधान सम्मेलनमा पार्टीको विधान परिमार्जन गर्नेछ। त्यसका लागि माओवादीले स्थायी कमिटी सदस्य गणेश साहको संयोजकत्वमा विधान मस्यौदा समिति बनाएको थियो।
उक्त समितिले मस्यौदा गरेको विधान पार्टीको तल्लो तहसम्म सर्कुलर गरी सुझाव संकलन गरिएको थियो। पार्टीका नेतृत्वदेखि तल्लो कमिटीहरूले दिएको सुझावमा सम्मेलनमा छलफल गरी निर्णय हुने छ ।
विधानसँगै नियमावली समेत बनाउने सम्बन्धमा पनि छलफल हुने छ । विधानले केन्द्रीय नेतृत्वदेखि स्थानीय नेतृत्व कस्तो बन्ने भन्ने तय गर्ने साहले बताए। समाजवादी क्रान्ति सम्पन्न गर्न कस्तो संगठनात्मक सिद्धान्त अपनाउने भन्ने निर्दिष्ट गर्नेगरी विधान सम्मेलनमा छलफल हुनेछ। Photo By: Mukunda Kalikote/Reporters Nepal
