काठमाडौं, २२ फागुन । नेपाली कांग्रेसका युवा नेता एवं प्रतिनिधि सभा सदस्य प्रदीप पौडेलले प्रधानमन्त्री पुष्पकमल दाहाल ‘प्रचण्ड’ ले नै कांग्रेस–माओवादीको गठबन्धन टिकाउन नसकेको बताएका छन् । हिजो (सोमबार) प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले प्रचण्डले गठबन्धनमा मिलाउन नसकेकाले आफूहरुलाई झुक्याएको बताए ।
साथै, नेता पौडेलले निवर्तमान सत्ता गठबन्धन बन्नु र टुट्नुमा पार्टी सभापति शेरबहादुर देउवाको हात रहेको बताए ।
‘मिलाएको पनि शेरबहादु देउवाजीले भत्काएको पनि उहाँले नै हो । मिलेको भत्किएको भन्न म चाहन्न । यो एउटा प्रवृत्ति थियो, अस्तिनै एउटा गठबन्धन बनायो भत्कियो, फेरि अर्को गठबन्धन बन्यो, त्यो पनि भत्कियो । फेरि अहिले यो गठबन्धन बनेको छ, यो पनि भत्किन्छ,’– उनले भने ।
साथै, एमाले–माओवादीले कम्युनिष्टको सबै सिद्धान्त छोडिसकेको बताए । नयाँ गठबन्धन पूरै अवधि जाओस् भन्ने आफूहरुको चाहना रहेको बताए । अब सत्ताको यात्रामा कांग्रेस जोडिन नहुने उनको भनाइ छ ।
