काठमाडौं, १८ चैत । रिपोर्टर्स क्लब नेपालको २६औं वार्षिकोत्वसको अवसरमा सूचना प्रविधि इन्जिनियर आनन्द रिमाल सम्मानित भएका छन् । शनिबार काठमाडौंको होटल एभरेष्टमा आयोजित समारोहमा प्रधानमन्त्री पुष्पकमल दाहाल ‘प्रचण्ड’ र क्लबका सभापति ऋषिराज धमलाले संयुक्त रुपमा सम्मान प्रदान गरेका हुन् । इन्जिनियर रिमालले सूचना प्रविधि क्षेत्रको आधुनिकीकरण र विकासमा पुर्याएको महत्वपूर्ण योगदानको कदर गर्दै क्लबले उक्त सम्मान प्रदान गरेको हो ।
‘नेपालको सूचना प्रविधि क्षेत्रको आधुनिकरण र विकासमा महत्वपूर्ण भूमिका खेल्दै आउनुभएको तपाईं सम्मानित व्यक्तित्व हुनुहुन्छ । सूचना प्रविधि क्षेत्रमार्फत तपाईंले मुलुकको यस क्षेत्रको विकासमा महत्वपूर्ण योगदान पु¥याउनु भएको छ । आफ्नो क्षेत्रमा सदैव समर्पित रही तपाईंले पुर्याउनुभएको योगदान प्रशंसनीय छ । तपाईंको यो महत्वपूर्ण योगदानको उच्च कदर स्वरूप रिपोर्टर्स क्लब नेपाल तपाईं श्री आनन्द रिमालज्यूलाई २६ औं बार्षिकोत्सव २०८० को अवसरमा विशेष सम्मानद्वारा अभिनन्दन गर्दछ,’– सम्मानपत्रमा भनिएको छ ।
क्लबको २६औं वार्षिक उत्सवको अवसरमा आयोजित कार्यक्रममा पूर्व प्रधानमन्त्री एवम् नेकपा (एमाले) का अध्यक्ष केपी शर्मा ओली, पूर्व प्रधानन्यायधीस हरिकृष्ण कार्की, नेपाल सरकारका मन्त्रीहरु, सांसदहरु, सचिवहरु, सुरक्षा निकायका प्रमुखहरु, नागरिक अगुवासहित विविध क्षेत्रका विशिष्ट ब्यक्तित्वहरुको उपस्थिति रहेको थियो ।
