काठमाडौं,२१ चैत । लामो समयपछि मैदान फर्किएका कमलसिंह ऐरीको सनसनीपूर्ण प्रदर्शनमा तीन खेलको एकदिवसीय सिरिज अन्तर्गतको पहिलो खेलमा आयरल्याण्ड ए ले नेपाल ए लाई १५८रनको सामान्य लक्ष्य दिएको छ ।
टस जितेर पहिले ब्याटिङ गरेको आयरल्याण्ड ए ३८।३ ओभरमा १५७ रनमा अलआउट भयो ।
आयरल्यान्डका लागि केड कार्मिचलले अर्धशतकीय पाली खेले । चौथो नम्बरका ब्याट्सम्यान केडले टोलीको खातामा ५१ रन थपे । यस क्रममा उनले ७७ बलको सामना गरी चार चौका पनि हिर्काए । कप्तान निल रकले पनि टोलीको खातामा ३९ रन थपे । पाँचौँ नम्बरमा क्रिज समाल्न आएका विकेटकिपर ब्याट्सम्यान निलले ३२ बलमा तीन छक्का र दुई चौका हिर्काए ।
आयरल्याण्डलाई सस्तैमा रोक्न नेपालका कमलसिंह ऐरीले ह्याट्रिक विकेट लिए ।
३९ औं ओभरको पहिलो बलमा लियाम म्याककार्थीलाई सहाब आलमको हातबाट ऐरीले क्याचआउट गराए । दोस्रो बलमा म्याथु हुम्फ्रेजलाई बोल्ड गरे भने तेस्रो बलमा बेन ह्वाइटलार्ई पनि बोल्ड गरे । ऐरीले ६.३ ओभर बलिङ गर्दा २१ रन खर्चेर चार विकेट लिएका छन् ।
साहब आलम र मौसम ढकाल पनि दुई-दुई विकेट हात पारेका थिए । रिजन ढकालले पनि आयरल्यान्डका एक ब्याट्सम्यानलाई पेभेलियन फर्काए ।
