श्रम तथा रोजगार मन्त्री फरमुल्लाह मन्सुरसँग पत्रकार ऋषि धमलाले मन्त्रिमण्डल विस्तार, राजपा नेपाललाई कसरी चुनावमा सहभागिता गराउने, पार्टीभित्रको कलहलाई कसरी हल गर्ने लगायतका विषयमा केन्द्रित रहेर गरेको कुराकानीको सम्पादित अंश :
राजपा नेपालले संविधान संशोधनविना निर्वाचनमा भाग लिँदैनौं भनिसक्यो सरकारले के छ ?
राजनीतिमा विश्वासको कुरा हुन्छ । प्रधानमन्त्री छान्ने निर्वाचनमा उहाँहरूले भाग लिनुभएको छ र त्यही भन्नुभएको थियो, तराईका माग सम्बोधन गर्नेछु, अहिलेको आवश्यकता निर्वाचन हो, निर्वाचनमा सबैको सहभागिता हुनु आवश्यक छ । यति भनेको अवस्थामा उहाँहरूले विश्वास गर्नुपरेन ?
असार १४ गतेको दिनमा दोस्रो चरणको निर्वाचन गर्न सक्छ सरकारले ?
किन नसक्ने ? सक्छ नि । यसमा सरकार कटिबद्ध छ । तीन सय ८८ मतले प्रधानमन्त्री बन्नुभएको छ । यो नै काम गर्ने आधार हो । हामी मुलुकको हितको लागि काम गर्नेछौँ ।
शेरबहादुर देउवाको सरकारले संविधान कहिले संशोधन गर्छ ?
हामी त्यसैको लागि एक ठाउँमा उभिएका छौँ । संविधानको स्वीकार्यतालाई बढाउनको लागि हामी लागिपरेका छौँ । तराईवादी दलका नेताका माग, जनताका माग त्यसैगरी उत्पीडित जनजातिका मागबारे हामी संवेदनशील छौँ । अरुले के भन्छन्– त्यता नजानुस् ।
दोस्रो चरणको निर्वाचन तोकिएको समयमा नगरे यो सरकारको औचित्य सकिन्छ नि ?
तपाईं कुन डरले यो प्रश्न गर्दै हुनुहुन्छ ? यो सरकार बनेको नै स्थानीय तह, प्रेदश र केन्द्र सभाको निर्वाचन गरेर मुलुकलाई निकास दिन हो । मैले राजपा नेपालका नेता साथीसँग कुरा गरेको छु । सबैलाई मिलाएर अघि जानुपर्छ भनेर हामी लागिरहेको बेला नकारात्मक कुरातर्फ जानुहुँदैन ।
यदि असार १४ गते निर्वाचन हुन सकेन भने तपाईं मन्त्रीबाट राजीनामा दिनुहुन्छ ?
अरे बा । निर्वाचन हुन्छ । काँग्रेसको नेतृत्वमा सरकार बनेको नै संविधान कार्यन्वयन गर्नको लागि त हो । सबैलाई विश्वासमा लिएर निर्वाचनमा जान्छौँ ।
अरुलाई त मिलाउने भन्नुहुन्छ, काँग्रेसभित्रकै अर्को पक्षलाई मिलाउन नसक्नेले देश मिलाउन सक्छ ?
एउटा कुरा सन्तानले अभिभावकसँग साइकल किनिदिन भन्छ । तत्काल अभिभावकले साइकल किनेर दिन सकेन भने त्यो सन्तान रिसाउँछ । जब त्यसलाई ‘गार्जेन’ले साइकल किनेर दिन्छ अनि सन्तान खुसी हुन्छ । काँग्रेसलाई तपाईंले बुझ्नुभएको नै छैन ।
रामचन्द्र पौडेल पक्षलाई मन्त्रिमण्डलमा ल्याउन सक्नुभएको छैन नि ?
रामचन्द्र को हो ? उहाँ काँग्रेस वरिष्ठ नेता होइन ? अहिले काँग्रेस भित्र जो मन्त्री भए पनि केवल काँग्रेस हो ।
काँग्रेस भित्र कति गुट छन् ?
सबैभन्दा पहिले बुझ्नुस्– काँग्रेस एउटा घर हो । एउटा घरभित्र कति परिवार हुन्छ ? आमाबुबा, छोराछोरी बुहारी अन्य सन्तान पनि हुन्छन् । त्यसैले म तराईबाट आएको छु । मैले धोती लगाउँछु । अर्को नेता अर्कै पोशाकमा आउनुहुन्छ । त्यो के फरक भयो र ? कोही कालो अनि कोही गोरो छ । जो जस्तो भए पनि सबै काँग्रेस हुन् ।
काँग्रेस अहिले पनि भागबन्डाको आधारमा चलेको छ भन्छन् ?
परिवारमा सबै जना हुन्छन् । यी सबै कुरालाई गुट नभन्दा हुन्छ ।
काँग्रेसमा बुढानीलकण्ठ र बोहराटारको मात्रै चर्चा हुन्छ नि ?
नेताहरुका घर त्यहाँ छन् । त्यसैले त्यहाँको चर्चा हुन्छ । जहाँ पनि नेता बस्ने ठाउँको चर्चा त भइहाल्छ नि ।
अन्तर्कलहको अन्त्य हुन्छ उसो भए ?
तपाईं यसबारे चिन्ता नलिनुस् । काँग्रेसका नेताबीच केही मतभेद रहे पनि राष्ट्रका लागि सबै त्यागेर लाग्नुहुन्छ । काँग्रेसले लोकतन्त्रको लागि जुन लगानी गरेको छ– त्यही पाठ सिकेर अघि बढेका नेता छन् । काँग्रेसलाई मिलाएर लिने क्षमतामा सभापति हुनुहुन्छ ।
मन्त्रिपरिषद्मा महिलालाई सहभागी गराउन सक्नुभएन नि ?
यो पूर्ण मन्त्रिमण्डल होइन । अझै महिला दलित, अन्य साथी सरकारमा आउन बाँकी छ । त्यसपछि पनि देखिएन भने भन्नुहोला । हाम्रो दलको सभापति तथा मुलुकको प्रधानमन्त्री हुनुहुन्छ । उहाँ योग्य नेता हो ।
