निर्वाचन क्षेत्र निर्धारण आयोगका अध्यक्ष पूर्वन्यायाधीश कमलनारायण दासले आफूहरुले युद्धस्तरमा काम थाल्ने बताएका छन् । निर्वाचन क्षेत्र निर्धारण आयोगमा कसरी काम गर्नुहुन्छ, सरकारले तोकेको समयमा काम गर्न सक्नुहुन्छ वा सक्नुहुन्न भन्ने सन्दर्भमा आयोगका अध्यक्ष दाससँग पत्रकार ऋषि धमलाले गरेको संक्षिप्त कुराकानीको सम्पादित अंश :
आयोगको अध्यक्ष बन्नु भन्दा पहिले कुनै राजनीतिक दलले यसबारेमा केही सोधेका थिए ?
सोधेका थिए ।
कुन–कुन दलका नेता कार्यकर्ताले सोध्नु भएको थियो नि ?
यति व्यक्तिले भन्नुभयो भन्नुपर्छ भन्ने जरुरी छैन् ।
२१ दिनको लागि आयोग बनाईएको छ ? काम गर्नक्नुहुन्छ ?
हामी पाँच जना छौँ। सबै साथीले सहयोग गर्नुहुन्छ । अर्कोतर्फ सरकारले हामीलाई सहज वातावरण बनाउने छ । हामी कठिन काम सहज तरिकाले सम्पन्न गर्ने कोशिस गर्नेछौँ ।
तीन हप्तामा ३९५ निर्वाचन क्षेत्र बनाउनुपर्नेछ होईन त ?
हो । हामी त्यसैको लागि यो जिम्मेवारीमा आएका छौँ। प्रदेश र केन्द्रको संख्या निर्धारण गर्नुपर्छ । हामीले आजबाटै कानुनले दिएको कार्य पुरा गर्नेछौँ।
निर्वाचन क्षेत्र निर्धारण आयोगमा बसेर काम गर्ने अवस्थासम्म आउदा कुनै अनुभव छ ?
कसरी हुन्छ ? यो आयोग नै पहिलो हो । गर्दै जाँदा हुने हो नि । हामी पाँच जनासँगै पूर्व अनुभव छैन् । काम गर्दै जादा सकिन्छ । सक्नु पर्छ ।
तपाईको अध्ययनको विषय कुन हो नि ?
मेरो राजनीतिशास्त्र हो ।
सर्वोच्च अदालतको प्रधानन्याधीश बनेको मान्छे निर्वाचन क्षेत्र निर्धारणको भूमिकामा आउनु भयो नि ?
सरकारले जिम्मा दिएको छ । काम गर्नुपर्छ । संसारमा जति पनि काम हुन्छन् । ती अधिकांश काम अनुभवका आधारमा हुन्छन् नि ?
पाँच जनाको टिमले तोकेको समयमा दिएका काम सम्पन्न गर्छ त ?
अरु आयोगको बारेमा मलाई थाहा भएन । हामी पाँचजना अनुभवी काम गरेको मानिस छौँ। भौतिक रुपले सके जति काम गछौँ। काम युद्धस्तरमा हुन्छ ।
जटिल काम छ नि ?
गाह्रो काम गर्ने मान्छे हो म । हामीले पाएको जिम्मा सक्दो पुरा गर्नेछौँ।
दुई नम्बर प्रदेशको हकमा के भन्नुहुन्छ ?
कानुनले भने जति हामीले काम गर्ने हो । भुगोलविद, मानवशास्त्र साथीहरू हुनुहुन्छ। सकेसम्म कानुनले हामीलाई दिएको अधिकारलाई सक्दो उपभोग गरेर जनताको हितमा काम गर्नेछौँ।
समय पुगेन हामीलाई समय थप्नुस भनेर भन्नुहुँदैन नि ?
हामी सकभर भन्दैनौ । हामी युद्धस्तर रुपमा काम गर्नेछँौ। ।
