८ साउन, पोखरा । स्थानीय तहको निर्वाचनमा पार्टीभित्रैका नेताबाट अन्तरघात भएको भन्दै नेपाली कांग्रेसले कारबाही सुरु गरेको छ । केन्द्रिय स्तरमा नै अन्तरघात गरेर पार्टीभित्रकै उम्मेदवारलाई हराउन भूमिका खेल्नेलाई कारबाही गरिने विषयमा छलफल भइरहेको छ । यसैबिच नेपाली काँग्रेस कास्की क्षेत्र नं ४ ले छ जनालाई कारबाही गरेको छ ।
स्थानीय तहको निर्वाचनमा बागी उम्मेदवार, तिनका प्रस्तावक, समर्थक र प्रचारप्रसार समितिमा रहेर काम गरेकामा उनीहरुलाई कारबाही गरिएको समितिका सभापति पोषनाथ शर्माले जानकारी दिए ।
कारबाहीमा पर्नेमा माछापुच्छ«े गाउँपालिका वडा नं ३ घाचोकका अध्यक्षका बागी उम्मेदवार बेलबहादुर गुरुङ, उहाँको प्रचारप्रसार समितिका संयोजक मीनबहादुर गुरुङ र सदस्य तिलबहादुर गुरुङ, अन्नपूर्ण गाउँपालिका–७ लुम्लेका वडाध्यक्षका बागी उम्मेदवार प्रेमबहादुर गुरुङ, प्रस्तावक कमलबहादुर गुरुङ र समर्थक हितमान गुरुङ छन् । उनीहरुलाई साधारण सदस्यतासमेत नरहने गरी कारबाही गरिएको सभापति शर्माले बताए । रासस
