२९ असोज, काठमाडौं । क्रिष्टियानो रोनाल्डोको गोलसँगै रियल मड्रिडले गेटाफेलाई हराएको छ र स्पेनिस ला लिगाको दोस्रो स्थानमा उक्लिएको छ ।
ग्यारेथ बेल विना मैदान उत्रिएको रियलले गेटाफेलाई २–१ गोल अन्तरले हराएको हो ।
गेटाफेको घरेलु मैदानमा भएको खेलमा रियलले ३९ औं मिनेटमा करिम बेन्जिमाको गोलबाट अग्रता लियो । ५६ औं मिनेटमा मोलिनाले बराबरी गोल फर्काए ।
तर, ८५ औं मिनेटमा रोनाल्डोले गोल गरेपछि रियल मड्रिडले २–१ गोल अन्तरले विजयी भएको छ ।
यो जित सबै प्रतियोगितामा लगातार चौथो जित हो ।
सुपर कपमा बार्सिलोनामाथि ३–१ ले जित हात पारेको खेलमा रेफ्रीलाई धकेलेका कारण रोनाल्डाले ५ खेलको प्रतिबन्ध खेपे । रोनाल्डोको अनुपस्थितिमा च्याम्पियन्स लिग र ला लिगाको साबिकको विजेताले ला लिगामा ४ अंक गुमायो ।
प्रतिबन्धपछि रोनाल्डोको पहिलो खेलमा नै रियल बेटिससँग अप्रत्यासित हार व्यहोर्यो ।
शनिबारको जितसँगै रियल मड्रिड १७ अंकका साथ दोस्रो स्थानमा उक्लिएको छ । तर, लिग लिडर बार्सिलोनाभन्दा अझै ५ अंकले पछाडि छ ।
अर्को खेलमा लिग लिडर बार्सिलोनाले एथ्लेटिको मड्रिडसँग १–१ को बराबरी खेलेको छ ।
लुइस स्वरेजको गोलसँगै बार्सिलोनाले एथ्लेटिको मड्रिडसँग बराबरी खेलेर ला लिगामा अपराजित यात्रा कायमै राखेको छ ।
शनिबार राति भएको खेलमा बार्सिलोना र एथ्लेटिको मड्रिडले १–१ गोलको बराबरी खेलेका हुन् ।
घरेलु मैदानमा भएको खेलमा एथ्लेटिको मड्रिडले २१ औं मिनेटमा निगुरेजको गोलबाट अग्रता लिएको थियो । पहिलो हाफमा यो अग्रता कायमै रह्यो ।
तर, ८२ औं मिनेटमा बार्सिलोनाका स्वरेजले बराबरी गोल फर्काए । त्यसअघि सकेण्ड हाफको सुरुमा नै लिओनल मेस्सीको फ्रिकिक पोष्टमा लागेको थियो ।
