१० मंसिर, काठमाण्डौ । पहिलो चरणको निर्वाचनमा सबैभन्दा बढी चर्चा गोर्खा क्षेत्र नम्बर २ को छ जहाँ एमालेको समर्थनमा माओवादी केन्द्रका नेता नारायणकाजी श्रेष्ठ र कांग्रेसको समर्थनमा नयाँ शक्ति नेपालका संयोजक एवम् पूर्वप्रधानमन्त्री डा. बाबुराम भट्टराई प्रतिस्पर्धामा छन् ।
पूर्व सहकर्मीसमेत रहेका र यसपटक अलल–अलग पार्टीबाट चुनाव लडेका उनीहरुमध्ये कसलाई गोर्खा २ का मतदाताले चुन्छन् व्यग्र चासोको विषय बनेको छ ।
घोषित रुपमा नै गठबन्धनको अभ्यासमा पहिलो पटक हुन लागेको निर्वाचनमा केही क्षेत्रमा रोचक प्रतिस्पर्धा हुने अनुमान गरिएको हो । गठबन्धनको मत, उम्मेदवारको व्यक्तित्व र केही टकरावका कारण पनि ती क्षेत्रको चुनावी प्रतिस्पर्धालाई चासोका साथ हेरिएको छ ।
चुनाव प्रचारका क्रममा एक अर्काप्रति भएका तीखा टिप्पणीका कारण समेत गोरखा २ नम्बर क्षेत्र चर्चामा छ ।
यस्तै, बाहलवाला सूचना तथा सञ्चारमन्त्री मोहनबहादुर बस्नेत र पूर्व सञ्चारमन्त्री अग्नि सापकोटाको चुनावी क्षेत्र सिन्धुपाल्चोक १ को प्रतिस्पर्धा पनि रोमाञ्चक हुने आँकलन गरिएको छ । प्रचारका दौरान दुई उम्मेदवारले एक अर्कालाई लगाएका आरोप पनि निकै चर्चामा छन् ।
सापकोटा पूर्वसूचना तथा सञ्चारमन्त्री हुन् भने बस्नेत बहालवाला । उनीहरुमध्ये कसले चुनाव जित्ला भनेर चासो व्याप्त छ । यद्यपि उम्मेदवारहरुले आ–आफ्नो जीत सुनिश्चित भएको दावी गर्दै आएका छन् ।
यस्तै सिन्धुपाल्चोक २ मा वाम उम्मेदवार शेरबहादुर तामाङ र लोकतान्त्रिक गठबन्धनका तर्फबाट राप्रपा (प्रजातान्त्रिक) का पशुपति शमशेर राणाबीचको प्रतिस्पर्धालाई पनि रोचक मानिएको छ । संविधानसभा सदस्यमा दुई पटक सोही क्षेत्रबाट पराजित राणा जितको खोजीमा छन् । तामाङ सो क्षेत्रमा लगातार दोस्रो जितको खोजीमा छन् ।
ओखलढुङ्गाको प्रतिस्पर्धा पनि चर्चामा छ । संविधानसभा सदस्यका रुपमा संसदमा खेलेको भूमिकाका कारण उम्मेदवारद्वय रामहरि खतिवडा र यज्ञराज सुनुवार दुबै संसदीय राजनीतिमा चर्चित छन् । प्रदेश नम्बर १ मा कांग्रेसको बलियो क्षेत्रका रुपमा रहेको ओखलढुङ्गामा वाम गठबन्धनपछि तीव्र प्रतिस्पर्धाको आँकलन गरिएको छ ।
काठमाडौँ ६ मा दुई पटकको पराजयपछि एमाले सचिव योगेश भट्टराई योपटक ताप्लेजुङबाट चुनावमा प्रतिस्पर्धा गरिरहेका छन् । हारमा ब्रेक लगाउने योगेशको दौडमा कांग्रेस उम्मेदवार केशव दाहालले कडा चुनौती दिने विश्लेषण हुने गरेको छ । भट्टराई र दाहालको चुनावी प्रतिस्पर्धालाई निकै चासोका साथ हेरिएको छ ।
नुवाकोट १ बाट कांग्रेसका रामशरण महत र वाम गठबन्धनका हितबहादुर तामाङ तेस्रो पटक प्रतिस्पर्धा गर्दैछन् । दुई पटक महतसँग हार व्यहोरेका तामाङ बदला लिने दौडमा छन् । भने, महत आफ्नो विरासत जोगाउने अभियानमा छन् ।
नुवाकोट २ मा कांग्रेसकै अर्जुननरसिंह केसी र एमालेका नारायण खतिवडा प्रतिस्पर्धामा छन् । दुईको चुनावी भिडन्तलाई पनि रोचक हुने आँकलन गरिएको छ ।
जाजरकोटमा शक्ति बस्नेत र राजीवविक्रम शाह, गोरखामा हरि अधिकारी र चिनकाजी श्रेष्ठको चुनावी प्रतिस्पर्धालाई पनि चासोका साथ हेरिएको छ ।
पाँचथरबाट कांग्रेसका भीष्मराज आङदेम्बे र एमालेका बसन्त नेम्वाङ तथा सोलुृखुम्बुको कांग्रेसका बलबहादुर केसीको भाग्य फैसला पनि यसै चुनावले गर्दै छ । सोलुखुम्बुका हरेक चुनाव जित्दै आएका केसीसँग माओवादीका हेमकुमार राई प्रतिस्पर्धामा छन् ।
माओवादी नेताहरु देव गुरुङ, वर्षमान पुन ‘अनन्त’, जनार्दन शर्मा, शक्तिबहादुर बस्नेत र महेन्द्रबहादुर शाहीको भाग्य फैसला पनि पहिलो चरणको निर्वाचनबाट हुँदैछ । यी पाँचै जना माओवादी नेताहरुका प्रतिस्पर्धा नेपाली कांग्रेससँग छ ।
गुरुङसँग दिलबहादुर घर्ती, अनन्तसँग अमरसिंह पुन, शर्मासँग गोपालजी जंग शाह, बस्नेतसँग राजीवविक्रम शाह र महेन्द्रबहादुर शाहीसँग भुपेन्द्रजंग शाही प्रतिस्पर्धामा छन् ।
माओवादीका पाँचैजना माओवादी नेताहरु मन्त्री भइसकेका र पार्टीमा बलियो प्रभाव जमाउँदै आएका नेताहरु हुन् । तर, मतदाताहरुमाझ प्रभाव जमाएका छन् कि छैनन् भन्ने थाहा पाउन चुनावी परिणामलाई कुर्नैपर्ने हुन्छ ।
पहिलो चरणको प्रदेश र प्रतिनिधिसभा सदस्य निर्वाचनबाट केही हेभी–वेट नेताहरुको भाग्य फैसला हुँदैछ । कसले चुनावमा बाजी मार्छन् भनेर थाहा पाउन भने २१ मंसिरमा हुने दोस्रो चरणको निर्वाचनपछि शुरु हुने मतगणनाको प्रतिक्षा गर्नुपर्ने छ ।
