काठमाडौं, २१ मंसिर । प्रतिनिधिसभा र प्रदेशसभा निर्वाचनको दोस्रो चरणमा आज मतदान सम्पन्न भएका ४५ जिल्लामा ६७ प्रतिशत मत खसेको निर्वाचन आयोगले जनाएको छ ।
निर्वाचन आयोगमा पत्रकार सम्मेलन गरी प्रमुख निर्वाचन आयुक्त डा. अयोधीप्रसाद यादवले सरदर ६७ प्रतिशत मत खसेको दाबी गरेका छन् । उनका अनुसार सबैभन्दा धेरै गुल्मीमा ७१ प्रतिशत मत खसेको छ ।
निर्वाचन अयाोगका अनुसार १२८ प्रतिनिधिसभा र २५६ प्रदेशसभा सदस्यका लागि ४५ जिल्लामा रहेका ७ हजार ७५२ मतदान स्थल र १५ हजार ३४४ मतदान केन्द्रमध्ये एक मतदान स्थलबाहेक सबैमा शान्तिपूर्ण मतदान भएको छ ।
उनले निर्वाचन शान्तिपूर्ण रुपमा सम्पन्न भएको भन्दै आम मतदाताहरुलाई धन्यवाद दिए । त्यस्तै उनले विगतमा भएका मतपरिणामलाई लिएर कुनै विवाद नहुने र त्यस्तो घटन नदोहोरिने विश्वास दिलाए ।
अर्घाखाँचीको सन्धीखर्क्स्थित नेटा मतदान स्थलमा रहेका दुवै मतदान केन्द्रको मतदान रद्ध गरिएको निर्वाचन आयोगका सचिव भोगेन्द्रराज शर्माले जानकारी दिए ।
मुख्य निर्वाचन अधिकृतले हस्ताक्षर नगरी मतपत्र दिएको भन्दै राजनीतिक दलका कार्यकर्ताले मतदान स्थल तोडफोड गर्नुका साथै मतपेटिकामा आक्रमण गरेपछि मतदान रद्ध गरिएको प्रमुख निर्वाचन आयुक्त यादवले जानकारी दिए । उनका अनुसार त्यस स्थलको मतदान केहिदिनभित्रै हुनेछ ।
मतदान सम्पन्न भएका ४५ जिल्लाका सबै मतपेटिका जिल्लाको मुख्य निर्वाचन अधिकृतको कार्यालयमा बुझाइनेछ । सर्वदलीय बैठकपछि मतगणना सुरु हुनेछ ।
