काठमाडौं, ८ पुस । नेपालमा हालै सम्पन्न भएको प्रदेश र प्रतिनिधि सभाको निर्वाचनको परिणाम आएको १५ दिनपछि भारतीय प्रधानमन्त्री नरेन्द्र मोदीले नेपालका तीन जना शीर्षस्थ नेता प्रधानमन्त्री समेत रहेका कांग्रेस सभापति शेरबहादुर देउवा, नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल पैचण्डसँग छुटछुट्टै कुराकानी गरे र बधाई दिए ।
मोदीले एमाले अध्यक्ष ओलीसँग विशेष कुराकानी गरेको स्रोतको दाबी छ । उनले करिब ८ मिनेटभन्दा बढि नै ओलीसँग सम्वाद गरेका थिऐ । नेपालमा निर्वाचन सम्पन्न भएलगत्तै नेपालका लागि भारतीय राजदुत मञ्जिव सिंह पुरी नयाँ दिल्ली गएका थिए । उनले त्यहाँ रहँदा नेपालको पछिल्लो राजनीतिक अवस्थाबारे ब्रिफिंग गरेका थिए । सोही अनुसार मोदीले नेपालका शीर्ष नेताहरुलाई एकै दिन बधाई तथा सफलताको शुभकामना दिएका हुन् ।
नेपालमा राष्ट्रिय सभासम्बन्धी अध्यादेशमा विवादित बनेका प्रमुख दलहरु खासगरी नेपाली कांग्रेस भर्सेस वाम गठबन्धनको विवाद अब विस्तारै सुल्झिनेतर्फका संकेतहरु देखिएका छन् । यसको पछि दलहरुवीच सम्वाद सुचारु देखिएको छ ।
ओलीलाई भारतका प्रधानमन्त्री मोदीले निर्वाचनमा सफलता प्राप्त गरेकामा बधाई मात्रै दिएनन भारत भ्रमणको निम्तो दिँदै स्वागतको लागि आफू आँतुर रहेको सुनाए । विहिवार अध्यक्ष ओलीलाई मोदीले टेलिफोन गरी हालै सम्पन्न निर्वाचनमा वाम गठबन्धनले ठूलो सफलता प्राप्त गरेकामा खुशी व्यक्त गर्दै बधाई दिएका हुन् ।
मोदीले पूर्वप्रधानमन्त्री ओलीसमक्ष नेपालमा तीनवटै निर्वाचन सम्पन्न भएकामा खुशी व्यक्त गर्नुभएको एमाले केन्द्रीय सचिवालय सचिव प्रदीपकुमार ज्ञवालीले जारी गरेको विज्ञप्तिमा उल्लेख छ ।
मोदीले यस सफलताले नेपालमा लोकतन्त्रलाई सुदृढ बनाएको तथा निर्वाचनमा हासिल परिणाम र गठबन्धनको जीतले नेपालमा राजनीतिक स्थायित्व कायम भई आर्थिक विकास हुने विश्वास व्यक्त गर्नुभएको जनाइएको छ ।
भारतीय प्रधानमन्त्रीले सरकार गठनलगत्तै भारत भ्रमणका लागि अध्यक्ष ओलीलाई निमन्त्रणा गर्दै आफू स्वागत गर्न आतुर रहेको र नयाँ सरकारसँग सहकार्य गर्न प्रतीक्षारत रहेको बताएका छन् । जवाफमा एमाले अध्यक्ष ओलीले भारतीय प्रधानमन्त्रीलाई आफूलाई प्राप्त बधाई तथा शुभकामनाका लागि धन्यवाद दिँदै आफ्नो ध्यान राजनीतिक स्थायित्व, लोकतन्त्रको सुदृढीकरण, सुशासन र आर्थिक विकासमा केन्द्रित रहेको बताएका छन् । “यसका लागि छिमेकीसँग सुसम्बन्ध कायम गरिनेछ ”, नेता ओलीले भनेका छन् ।
प्रतिनिधिसभामा नवनिर्वाचित सांसद ओलीले खासगरी भारत र चीनसँग शान्ति र समृद्धिका लागि सहकार्य गरिने बताउँदै भारतीय प्रधानमन्त्री मोदीलाई पनि नेपाल भ्रमणका लागि निमन्त्रणा दिएका छन् । सरकार गठनलगत्तै नेपाल भ्रमणका लागि औपचारिक निमन्त्रणापत्र पठाइने ओलीले बताए ।
प्रतिउत्तरमा ओलीले पनि गुजरातलगायत प्रान्तमा हालै सम्पन्न निर्वाचनमा प्राप्त सफलताका लागि भारतीय जनता पार्टीका नेता मोदीलाई पनि बधाई दिए । उनले नेपालको विकासमा भारतको सहयोग रहेको उल्लेख गर्दै फेरि पनि सशक्त रुपमा सहयोग रहने विश्वास व्यक्त गरेका थिए ।
नेपालमा अब एमाले अध्यक्ष ओलीको नेतृत्वमा सरकार बन्ने गृहकार्य सुरु भएको छ । उनी छिट्टै प्रधानमन्त्री पक्कापक्की भएको छ । तर यो बीचमा भारतीय प्रधानमन्त्री नै नेपाल भ्रमणमा आउने संभावना पनि छ । खासगरी मोदी अरुण तेस्रोको शिल्यानास गर्न नेपाल आउन सक्ने सूत्रहरुको भनाई छ ।
मोदीको एक कल फोनपछि नेपालका दलका नेताहरुवीच सौहार्दपूर्ण वातावरणमा कुराकानी सुचारु भएको छ । खासगरी कडा रुपमा प्रस्तुत भैरहेका एमाले अध्यक्ष ओली अहिले नरम बनेका छन् । माओवादी केन्द्रका अध्यक्ष पुष्पकमल दाहाल प्रचण्डले पनि जित्नेले विन्रमता देखाउनुपर्ने अभिव्यक्ति दिएकोले अहिले ओली नरम रुपमा प्रस्तुत भएको स्रोतको दाबी छ ।
