२० पुस, काठमाण्डौ । शिक्षा अभियन्ता अभिषेक घिमिरेको नेतृत्वमा बृहत राष्ट्रिय शिक्षा अभियान सुरु हुने भएको छ ।
देशभरका करिब पाँंच हजारबढी निजी तथा सामुदायिक स्कुल र कलेज पुगेर बीस लाख भन्दा बढी विद्यार्थी, युवा, शिक्षक र अभिभावकलाई उत्प्रेरणा तथा जागरणसहितको तीन वर्षीय महाअभियानमा अभियन्ता घिमिरे होमिने भएका हुन् ।
शिक्षक, विद्यार्थी र अभिभावकको त्रिकोणात्मक सम्बन्धबाट मात्र शिक्षाको समुचित उद्येश्य प्राप्ति हुने भएकाले यी सबै पक्षलाई समेटिएको आयोजक समितिले जनाएको छ ।
शीप, संस्कार र प्रविधिसहितका तीन खम्बायुक्त शिक्षाको आवश्यकतालाई उजागर गर्दै संस्कारसहितको शिक्षा, शीपसहितको शिक्षा र प्रविधिसहितको शिक्षा जस्ता नारा र मुद्धा लिएर अभियान अघि बढ्नेछ ।
अभियानअन्तर्गत दैनिक कम्तिमा दुईओटा स्कुल र एक कलेजमा पुगेर विभिन्न विषयमा विद्यार्थीलाई सुन्दर अक्षर लेख्ने कला, नैतिक चरित्र निर्माण, विद्यालय तथा सडक सुरक्षा लगायतका विषयमा जानकारी तथा उत्प्रेरणा दिइने अभियन्ता घिमिरेले जानकारी दिए ।
त्यस्तै, साप्ताहिक र मासिक रुपमा हजारौंको सहभागितामा स्वरोजगार र उद्यमशीलताका लागि युवा उत्प्रेरणा, असल आमाबाबु तथा असल अभिभावक, शिक्षक उत्प्रेरणा जस्ता कार्यक्रम आयोजना गरिने छन् ।
त्यस्तै, प्रत्येक महिना शिक्षाविद, शिक्षाकर्मी, स्कुल प्रिन्सिपल, शिक्षा मन्त्रालय र शिक्षा विभागका पदाधिकारी, अभिभावक, विद्यार्थी, पत्रकारलगायत शिक्षासँंग सरोकार राख्ने सबैको उपस्थितिमा शिक्षाका नीति निर्माण, पाठ्यक्रमलगायत राष्ट्रिय शैक्षिक मुद्धामा अन्तरक्रिया तथा छलफल गरिनेछ ।
महाअभियानको यात्रामा भेटिएका अत्यन्त जीर्ण र पिछडिएका समुदायका बालबालिका पढ्ने कुनै पाँंच स्कुललाई नमूना विद्यालयका रुपमा विकास गरिने महाअभियानका अभियन्ता घिमिरेले बताए ।
