वासिङ्टन, अमेरिका, २२ पुस : अमेरिकी राष्ट्रपति डोनाल्ड ट्रम्पले शनिबार विहानै ट्वीटर सन्देशमा आफू ‘एकदम स्थिर क्षमतावान स्वभाव’को मानिस भएको जनाउनुभएको छ ।
एउटा विवादास्पद पुस्तकका लेखक ह्वाइट हाउसका कर्मचारीले ट्रम्पलाई ‘केटाकेटी जस्तो’ हेर्ने गरेको बताएपछि यसबारे प्रतिक्रिया जनाउदै राष्ट्रपतिको यो भनाइ आएको हो ।
माइकल वूल्फले ‘फायर एण्ड फ्युरीः इन्साइड दि ट्रम्प ह्वाइट हाउस’ शीर्षकको आफ्नो पुस्तक करिब २०० वटा अन्तर्वार्तामा आधारित रहेको बताउँदै पुस्तकमा ट्रम्पलाई ‘केटाकेटी जस्तो’ भनी चित्रण गरेको भनी विभिन्न सञ्चारमाध्यमले लेखेका छन् ।
राष्ट्रपति ट्रम्पले बिहानै लगातार ट्वीटरमार्फत भन्नुभएको छ, “मेरो जीवनभर मेरा सवैभन्दा महत्वपूर्ण दुई सम्पत्ति भनेका नै ‘वौद्धिकता’ र ‘क्षमता’ हुन् ।”
आफूमाथि हिलारी क्लिन्टनले पनि पटक पटक वुल्फले जस्तै विशेषण लगाएर आरोपित गर्ने गरेको तर अहिले ती सबै अन्त्य भैसकेका ट्रम्पको दावी छ ।
उहाँले भन्नुभयो, “म एक सफल व्यवसायी, वरिष्ठ टेलिभिजन स्टार हुँदै एकै पटकमा अमेरिकी राष्ट्रपतिमा निर्वाचित वन्न सफल व्यक्ति हुँ ।” “मेरो विचारमा यसले मलाई वौद्धिक मात्र नभै क्षमतावान् व्यक्ति भएको पुष्टि गर्छ,” ट्रम्पले लेख्नुभएको छ ।
वासिङ्टनमा छोटो समयमा नै ठूलो सङ्ख्यामा विक्री भएको पुस्तकबारे ट्रम्पले भन्नुभयो, “वूल्फको पुस्तक मैले ‘दिक्कलाग्दो र झुटो’ भएको पाएँ ।”
राष्ट्रपति ट्रम्पले आफूलाई चोट पु¥याउन सञ्चारमाध्यम र अरूले उक्त पुस्तकलाई अघि बढाएकोे दावी गर्नुभएको छ ।(रासस/सिन्ह्वा)
