९ माघ, काठमाण्डौ । प्रदेश नम्बर एकको मुख्यमन्त्रीका प्रमुख दाबेदार मानिएका एमाले नेता शेरधन राईले आफैँले पनि आफ्नो दाबी प्रस्तुत गरेको बताएका छन् । नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै राईले पार्टीभित्र दाबी प्रस्तुत गरेको बताए ।
संसदीय दलको नेता चुनिएर मुख्यमन्त्री बन्ने प्रक्रियाअनुसार नै आफू अगाडि बढ्ने राईले बताए । “म प्रदेश नम्बर एकको मुख्यमन्त्रीको प्रमुख दाबेदारको रुपमा दौडमा भाग लिइरहेको छु ।”
अब केही दिनमा नै संसदीय दलको नेता चुनिने राईले बताए । प्रदेश एकमा आफू सर्वसम्मत संसदीय दलको नेता बन्न सक्ने स्थिती नभएकाले मतदानबाट नै चुनिने उनको भनाई छ ।
उक्त प्रदेशमा एमालेकै भिम आचार्यले पनि मुख्यमन्त्रीको दाबी गर्दै आएकाले राई सर्वसम्मत हुन नसकेका हुन् ।
“आचार्य मात्रै होइन । अरु पनि दाबेदार हुन सक्नुहुन्छ । हामी केही प्रारम्भिक छलफल गछौँ । छलफलले सर्वसम्मत भयो भने भइहाल्यो, नत्र चुनाव गरेरै दलको नेता चुन्छौँ ।” राईले भने ।
आफू कुनै पनि हालतमा मुख्यमन्त्रीको दौडबाट पछि नहट्ने अडान राईले लिएका छन् । आफू सम्पूर्ण रुपले मुख्यमन्त्रीका लागि योग्य भएकाले पछि हट्नुपर्ने स्थिती नरहेको उनले स्पष्ट पारे ।
