काठमाडौँ, १६ माघ (रासस) : नेकपा (एमाले)का महासचिव ईश्वर पोखरेलले टोखालाई सांस्कृतिक पर्यटन नगरीका रुपमा विकास गर्नुपर्ने बताउनुभएको छ ।
आज टोखा संस्कृति सम्पदा संरक्षण दबूले आयोजना गरेको ‘टोखाको मौलिक संस्कृति, सम्पदा संरक्षण तथा पर्यटन विकाससम्बन्धी’ अन्तरक्रिया कार्यक्रममा उहाँले भन्नुभयो –“टोखाको पहिचान संस्कृति रहेकाले यसलाई सास्कृतिक पर्यटन नगरीको रुपमा विकास गर्नुपर्छ ।”
महासचिव पोखरेलले टोखामा रहेका सांस्कृतिक सम्पदा संरक्षण गर्नमा आफूले सक्दो सहयोग गर्नुपर्नेमा जोड दिदैं टोखालाई धार्मिक सर्किट रुपमा विकास गर्न प्रतिबद्धता व्यक्त गर्नुभयो ।
पाँच वर्षमा टोखाको विकासको मुहार फेरिने बताउँदै उहाँले “टोखामा रहेका धार्मिक सम्पदाको रक्षा गर्नका लागि स्थानीयवासी एकजुट हुनुपर्छ”, भन्नुभयो ।
कार्यक्रममा प्रदेशसभा सांसद दीपक निरौलाले टोखाको विकासका लागि टोखावासी आफैँ लाग्नुपर्ने बताउँदै टोखालाई अन्य नगरपालिकासँग जोड्दै पर्यटकीय क्षेत्रका रुपमा विकास गर्नुपर्नेमा जोड दिनुभयो ।
टोखा नगरपालिकाका प्रमुख प्रकाश अधिकारीले टोखाको मौलिकता मास्न दिनु हुँदैन भन्दै यसको गुरुयोजना निर्माण गरेर टोखामा रहेका सम्पदाको संरक्षण गर्ने बताउनुभयो ।
पुरातत्व विभागका महानिर्देशक भेषनारायण दाहालले टोखा आफँैमा सम्पदाको नगरी भएकाले यसको वास्तुकलालाई संरक्षण गर्नुपर्ने चर्चागर्दै भूकम्पपछि ध्वस्त भएका टोखाका सम्पदाको पुनःनिर्माणका लागि विभागले सक्रियताका साथ लागिरहेको बताउनुभयो ।
एमालेका केन्द्रीय सदस्य सूर्य थापाले टोखालाई पर्यटनका रुपमा विकास गर्नका लागि होमस्टे र राम्रा होटल सञ्चालन गर्नुपर्ने बताउँदै सांस्कृतिक चाडपर्वलाई आर्थिक उपार्जनसंग जोडिनुपर्ने धारणा व्यक्त गर्नुभयो ।
उपत्यकाका प्राधिकरणका प्रमुख आयुक्त भाइकाजी तिवारीले टोखाका मौलिक सम्पदा नाश हुँदै गएको भन्दै त्यसको संरक्षणका लागि स्थानीयवासीले अग्रसरता देखाउनुपर्ने बताउनुभयो ।
कार्यक्रममा दबूका अध्यक्ष मनिराज डंगोलले कार्यपत्र प्रस्तुत गर्दै टोखाको मौलिक संस्कृति, सम्पदा, संरक्षण, प्रवद्र्धन तथा पर्यटन विकासका लागि अधिकार सम्पन्न समिति गठन गर्नुपर्नेमा जोड दिनुभयो ।
