माघ २७, काठमाण्डौ । राष्ट्रियसभामा तीन जना सदस्य मनोनित गर्ने विषयमा राष्ट्रपति र प्रधानमन्त्रीबिच विवाद देखिएको छ ।
प्रधानमन्त्री शेरबहादुर देउवाले तीन जना मनोनित गर्ने व्यक्तिको नाम लिएर शनिवार राष्ट्रपति विद्यादेवी भण्डारीलाई भेट्न गएका थिए । तर भण्डारीले देउवाले लगेका नामप्रति असन्तुष्टी जनाएको बताइएको छ ।
अर्कोतिर नेकपा एमालेले आफ्नो नेतृत्वमा सरकार बनेपछि तीन जना मनोनित गर्न पाउनुपर्ने दाबी गर्दै आएको छ । तर देउवाले अहिलेकै सरकारले राष्ट्रियसभालाई पूर्णता दिनुपर्ने भन्दै नाम राष्ट्रपति समक्ष सिफारित गर्न लागेका हुन् ।
एमाले अध्यक्ष केपी ओलीले पनि देउवाले गरेको सिफारिसअनुसारको व्यक्ति मनोनित नगर्न राष्ट्रपतिलाई दबाब दिएको बताइएको छ ।
सरकारले राष्ट्रियसभाका लागि गोपालकुमार बस्नेत (झापा), चाँदनी जोशी (काठमाडौं) र कृष्णप्रसाद पौडेल (स्याङ्जा) को नाम पठाउने निर्णय गरेको थियो ।
बालुवाटारमा शुक्रबार साँझ बसेको मन्त्रिपरिषद बैठकले उल्लेखित तीन जनालाई राष्ट्रियसभामा नियुक्तिका लागि राष्ट्रपति समक्ष सिफारिस गर्ने निर्णय गरेको थियो ।
सोही निर्णय लिएर आज प्रधानमन्त्री देउवा राष्ट्रपतिकहाँ पुगेका थिए । तर राष्ट्रपति भण्डारीले नामप्रति असन्तुष्टी मात्रै नभै चुनाव हारेर म्यान्डेट गुमाइसकेकाले नयाँ सरकारलाई नाम सिफारिस गर्न दिनुपर्ने दबाब दिएकी थिइन् । देउवाले पनि आफूमाथि अधिकार भएको भन्दै बस्नेत, जोशी र पौडेललाई नै मनोनित गर्नुपर्ने अडान राखेपछि विवाद देखिएको हो ।
नेपालको संविधानको धारा ८६ को उपधारा २ ख बमोजिम सरकारले राष्ट्रिय सभामा नियुक्तिका लागि तीन जनाको नाम राष्ट्रपति समक्ष सिफारिस गरेको हो । सिफारिसमा परेका बस्नेत झापा कांग्रेसका पूर्वसचिव हुन् । कांग्रेस विभाजित हुँदा उनी शेरबहादुर देउवा नेतृत्वको प्रजातान्त्रिक कांग्रेस झापाका जिल्ला सभापति थिए ।
यस्तै जोशी महिला विकासका लागि संयुक्त राष्ट्रसंघीय कोषकी दक्षिण एसिया क्षेत्रकी पूर्वनिर्देशक हुन् । जोशीसँग पद्मकन्या क्याम्पसमा प्राध्यापन गरेको पनि अनुभव छ । राष्ट्रियसभा सदस्यका लागि सिफारिस पौडेल कांग्रेस केन्द्रीय कार्यालयका मुख्यसचिव हुन् ।
