काठमाडौं, १ फागुन । अध्यक्ष केपी शर्मा ओलीले एकलौटी ढंगले गतिविधि अघि बढाएको भन्दै नेकपा एमालेभित्र बरिष्ठ नेताद्धय झलनाथ खनाल र माधव कुमार नेपालले ओलीविरुद्धको क्याम्पियन अघि बढाएका छन् ।
नेताद्धय खनाल र नेपालले आज साँझ आफू निकटका शीर्ष नेताहरुसँग गोप्य परामर्श थालेको स्रोतको दाबी छ । अध्यक्ष ओलीले हालै सम्पन्न निर्वाचनमा टिकट वितरणदेखि प्रदेशको मुख्यमन्त्री बनाउनेबारे सम्म आफूहरुलाई वास्ता नगरेको बरु उल्टै आफ्नो गुटका नेताहरुलाईमात्रै पक्षपोषण गरेको भन्दै उनीहरुले यस्तो गोप्य भेला गरेका हुन् ।
ओलीको विरुद्धमा एक भएर लाग्ने भन्दै उनीहरुले आफू पक्षीय नेताहरुको छुट्टै भेला गरेका हुन् । अब बन्ने सरकारको नेतृत्व एमालेले गर्ने निश्चित छ । यस्तो अवस्थामा ओलीले पुनः केन्द्रिय सरकारमा समेत आफूहरुलाई बाईपास गर्न सक्ने आँकलनसहित खनालनेपाल पक्षधरहरुले भेला गरेर त्यसको विरुद्धमा सशक्त भएर लाग्ने आजको गोप्य भेलामा छलफल भएको स्रोतको दाबी छ ।
नेता नेपालले चितवनबाट काठमाडौं फर्किएलगत्तै उनीहरुको गोप्य भेला काठमाडौंको कुनै एक नेताको घरमा बसेको हो ।
