काठमाडौं, १३ फागुन । नेकपा माओवादी केन्द्रको भागमा परेको सभामुख पदको लागि अहिले पाटीभित्र चार जना प्रभावशाली नेताहरुले आ–आफ्नो दाबी प्रस्तुत गरिरहेका छन् ।
एक पदको लागि चार जनाले आफ्नो दाबी प्रस्तुत गरेपछि अध्यक्ष पुष्पकमल दाहाल प्रचण्डपनि यतिबेला सकसमा परेका छन् । एमाले–माओवादी एकता प्रक्रियामा सुरुदेखि नै निरन्तर सक्रिय रहेका र महत्वपूर्ण भूमिका निर्वाह गरेका नेता कृष्णबहादुर महरापनि यो रेसमा देखिएका छन् ।
महरासँगै पूर्वसभामुख ओनसरी घर्तीमगरपनि दाबेदार हुन् । उनले कुनै पनि हालतमा नछोड्ने जिकिर गरिसकेकी छिन् ।
त्यस्तै यो रेसमा रामबहादुर थापा बादलले आफू निकट नेता देव गुरुङलाई अघि सारेका छन् । पछिल्लो समय बादलले पार्टीभित्र आफ्नो प्रभुत्व जमाईरहेका छन् । उनी स्वयमले वर्तमान सरकारमा पार्टीको तर्फबाट नेतृत्व गरेर जाने भएका छन् ।
उता अर्का बरिष्ठ नेता नारायणकाजी श्रेष्ठले पनि सम्मानजनक रुपमा अघि बढ्न चाहेको हो भने आफू निकटका नेता गिरिराजमणि पोखरेललाई उक्त पद दिईनुपर्ने अडान अध्यक्ष प्रचण्डसामू राखेका छन् ।
तर प्रचण्डको भित्री चाहना भने महरालाई नै अघि सार्ने रहेको स्रोतको दाबी छ । नेता वर्षमान पुनले आफ्नी श्रीमती ओनसरीलाई नै सभामुख बनाउन प्रचण्डलाई भेटेरै दबाब दिएका छन् ।
