काठमाडौं, १३ चैत्र । प्रधानमन्त्री केपी शर्मा ओलीको भारत भ्रमणपछिमात्रै नेकपा एमाले र माओवादी केन्द्रबीच एकता हुने भएको छ ।
स्रोतका अनुसार एमाले–माओवादी एकता घोषणाको लागि अन्तिम गृहकार्य सुरु भएपनि प्रधानमन्त्रीको भारत भ्रमणपछिमात्रै बृहत्त पार्टी एकता हुने भएको हो । हुन त दुवै पार्टीका नेताहरुले प्रधानमन्त्री ओलीको भारत भ्रमणअघि नै एकता गर्ने तयारी भएको बताएका थिए ।
प्रधानमन्त्री ओलीसमेतले भारत भ्रमणअघि नै एकता प्रस्ताव गरेका थिए । सोही अनुसार माओवादीले पनि तयारी थालेको थियो । तर, अहिले एकताको लागि केही विषयमा छलफल गर्नुपर्ने भएकोले एकता भ्रमणपछि धकेलिएको हो ।
माओवादी केन्द्रको पार्टी केन्द्रिय कार्यालय पेरिस डाँडामा गृहमन्त्री समेत रहेका माओवादी नेता रामबहादुर थापा बादलले आफू मातहतको समितिको आज बैठक बोलाएर छलफल थालेका छन् ।
