चैत १४, काठमाण्डौ । नेपाली कांग्रेसका नेता धनराज गुरुङले केन्द्रिय समिति बैठकमा कांग्रेसका कमी कमजोरी सुधारेर अगाडि बढ्ने विषयमा छलफल केन्द्रित भएको बताएका छन् ।
गत ९ गतेदेखि कांग्रेसको केन्द्रिय समिति बैठक पार्टी कार्यालय सानेपा ललितपुरमा बसिरहेको छ । बैठकको एजेण्डा चुनावमा कांग्रेसले बेहोरेको हारको समिक्षालाई पहिलो प्राथमिकतामा छ ।
नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै नेता गुरुङले चुनावमा बहोरेको अनपेक्षित नतिजा, टिकट वितरणमा भएका कमी कमजोरी र घात अन्तरघातका विषयमा छलफल केन्द्रित भएको बताए ।
“दुनियाँका अगाडि टिक विक्रि भएको छ, लिलामी भएको कुरा आइरहेको छ । यसका लागि पनि न्यायिक छानविन समिति गठन गर्नुपर्छ । त्यसपछि जे हो त्यही कुरा बाहिर आउँछ ।” गुरुङले भने ।
बैठकले ढिलोमा जेठभित्र बस्ने गरी महासमितिको बैठक बोलाउने उनले बताए । विधान नै संशोधन गर्नुपर्ने अवस्था रहेकाले जति सक्दो छिटो महासमितिको बैठक बोलाउनुपर्ने उनको तर्क छ ।
देश नयाँ संरचनामा गइसके पनि कांग्रेसको संगठन पुरानै संरचनाअनुसार भएकाले विधान संशोधन गरेर नयाँ संरचनाअनुसार पार्टीको संगठन निर्माण गर्नका लागि महासमितिको बैठक अनिवार्य भएको गुरुङले बताए ।
महासमितिको बैठकपछि महाधिवेशन नै कांग्रेसको प्रस्थानविन्दु हुने गुरुङको भनाई छ ।
चुनाव हारेको विषयमा भने सिङ्गो केन्द्रिय समितिले आत्मालोचना गर्नुपर्ने उनको तर्क छ । एकअर्कालाई दोष थोपरेर पार्टीमा सुधार नहुने उनको तर्क छ ।
