वैशाख ३, काठमाण्डौ । नेपाली कांग्रेसका सभापति शेरबहादुर देउवा नयाँ रणनीति बुन्दै पदाधिकारी नियुक्तिको तयारी गरेका छन् । देउवाले उपसभापतिमा विमलेन्द्र निधी र पूर्णबहादुर खड्कालाई महामन्त्री बनाउन लागेका छन् ।
त्यसैगरी सहमहामन्त्रीमा मानबहादुर विश्वकर्मालाई बनाउने तयारी भइरहेको छ । यसअघि मिन विश्वकर्मालाई सहमहामन्त्री बनाउन खोजे पनि देउवा गुटभित्रै सहमत नभएको बताइएको छ ।
यता रामचन्द्र पौडेलले सह महामन्त्रीमा आफ्नो पक्षको नेतालाई नियुक्ति गर्न दबाब दिइरहेका छन् । तर सहमहामन्त्री पौडेल पक्षलाई बनाउँदा पदाधिकारीतर्फ आफू अल्पमतमा पर्ने भएपछि पौडेलको माग पुरा गर्ने स्थितीमा छैनन् ।
कांग्रेस सभापति शेरबहादुर देउवाले महाधिवेशनको दुई वर्षपछि पार्टी पदाधिकारी मनोयनको तयारी थालेका हुन् । १३ औं महाधिवेशनबाट पार्टीको नेतृत्वमा पुगेको दुई वर्ष बितिसक्दा पनि सभापति देउवाले पार्टी पदाधिकारी मनोनयन नगरेको भन्दै पार्टी्भित्र चर्को आलोचना हुँदै आएको थियो ।
स्थगित भएको केन्द्रिय समिति बैठक पुनः सुरु भएपछि सभापति देउवा पदाधिकारी मनोनयन गर्ने तयारीमा जुटेका छन् । बैठकबाट पदाधिकारी मनोयनसँगै महासमिति भेलाको मिति तय गर्ने र विधान मस्यौदा समिति बनाउने तयारी छ ।
गत चैत ९ गतेदेखि जारी कांग्रेस केन्द्रीय कार्यसमिति बैठक कांग्रेस नेता खुमबहादुर खड्काको निधनका कारण आइतबारदेखि स्थगित छ ।
केन्द्रीय सदस्यहरू बोलिसकेपछि देउवाले पदाधिकारी मनोयन प्रस्ताव बैठकमा पेस गर्ने तयारी गरिरहेका स्रोतहरूको दाबी छ ।
देउवाले पार्टीको एक उपसभापति, एक महामन्त्री र एक सहमहामन्त्रीसहित नौ केन्द्रीय सदस्य मनोयन गर्न बाँकी छ ।
देउवानिकट एक नेताका अनुसार चैत मसान्तभित्रै देउवाले ४० विभागसमेत गठनको तयारी गरेका छन् ।
कांग्रेस महासमिति बैठकले पार्टीको विधान परिमार्जन गरी संघीय मोडलमा लैजाने तयारी भइरहँदा देउवाले केन्द्रीय समिति र विभागहरूमा पूर्णता दिन लागेका हुन् । महासमितिमार्फत संघीय संरचनाअनुसार परिमार्जन हुने कांग्रेस विधानमा पदाधिकारीहरूको संख्या थप्ने–नथप्नेबारे कांग्रेसभित्र व्यापक अन्तरविरोध देखिएको बेला १३औं महाधिवेशनको प्रावधानअनुसार बाँकी पदाधिकारी मनोनयन गर्ने निष्कर्ष देउवाले निकालेका हुन् ।
