काठमाडौं, वैशाख ६ । नेपाली कांग्रेसका नेता प्रकाशमान सिंहले जनताको समृद्धिको चाहना पूरा गर्न सत्तापक्ष र प्रतिपक्ष मिलेर अगाडि बढ्नुको विकल्प नभएको विश्वास दिलाएका छन् ।
नेपाल विद्यार्थी संघको ४९औं स्थापना दिवसका अवसरमा बिहीबार काठमाडौंमा भएको एक कार्यक्रममा उनले देशलाई आर्थिकरुपमा समृद्ध बनाउने जिम्मेवारी सरकारमा रहेको भएपनि प्रतिपक्षको भूमिका पनि महत्वपूर्ण हुने बताए ।
उनले आर्थिक समृद्धिको चाहना पूरा गर्न नेपाली कांग्रेस अगाडि बढिसकेको बताए । सरकारमा जानु कुनै नौलो कुरा नभएको भन्दै नेता सिंहले राजनीतिक उपलब्धि संस्थागत गर्न सबै दल मिलेर जानुपर्ने धारणा राखे ।
कांग्रेसको नेतृत्व कमजोर हुँदा सिंगो पार्टी कमजोर भएको भन्दै उनले नेतृत्व परिवर्तनपछि कांग्रेसले गति लिने दावी गरे ।
कार्यक्रममा नेता डा. शेखर कोइरालाले कांग्रेसभित्र आमूल परिवर्तनको खाँचो रहेको औंल्याए । कांग्रेसलेमात्र मुलकलाई अगाडि बढाउनसक्ने भन्दै उनले आगामी सरकार कांग्रेसको हुने दावीसमेत गरे ।
नेता कोइरालाले पार्टीलाई सही बाटोमा हिँडाउन नेपाल विद्यार्थी संघले सशक्त भूमिका खेल्नुपर्ने बताए ।
अर्का केन्द्रीय सदस्य कल्याण गुरुङले काँग्रेसभित्र देखिएको सामन्तवादी शैलीलाई परास्त गर्नुपर्नेमा जोड दिदैं “नेविसंघका हरेक विद्यार्थी आत्मनिर्भर भए मात्र कसैले हेप्न सक्दैन,” भने ।
नेविसंघ प्रदेश नं ३ का संयोजक रामप्रसाद अधिकारीले कमजोर काँग्रेसलाई बलियो बनाउन नेविसंघले महत्वपूर्ण भूमिका खेल्ने बताउँदै नेविसंघको ११ जिल्लामा देखिएको विवाद समाधान गर्न वर्तमान नेतृत्व गम्भीर नभएको आरोप लगाए ।
कार्यक्रममा काँग्रेस नेता प्रा डा गोविन्दराज पोखरेल, उमेशजंग रायमाझी, नेविसंघका महामन्त्री कुन्दनराज काफ्ले, नेविसंघका नेता लीलाबल्लभ दाहाल, मनोज वैद्य, सुशील भट्टलगायतले सबै एकताबद्ध भएर अगाडि बढे मात्र नेविसंघ र काँग्रेस बलियो हुनुपर्नेमा जोड दिए ।
कार्यक्रममा विद्यार्थी संघका नेताहरुले भने सरकारले विद्यार्थीको मागलाई बेवास्ता गरेको भन्दै विद्यार्थी शक्तिलाई कम नआँक्न चुनौती दिएका थिए ।
यसैबीच आजै नेपाल विद्यार्थी संघ काठमाडौँले नेविसंघको स्थापना दिवसका अवसरमा शान्तिबाटिकामा दीप प्रज्वलन गरेको छ ।
तस्विर : मुकुन्द कालिकोटे
