बेनी, म्याग्दी, १० वैशाख : विद्यालयमा भर्ना अभियान सञ्चालन भइरहेको अवस्थामा १२ वर्षीया निरूता विक बिरामी बुबाआमाको हेरचाहमा व्यस्त थिइन् ।
आसपासका क्षेत्रबाट विद्यालय पोशाकमा आफ्नै उमेरका साथी विद्यालयमा जाँदै गर्दा निरूताले आमाको कोखमा रहेको भाइको रेखदेख गर्नुपर्ने बाध्यता थियो । उमेरले १२ वर्ष पुगे पनि निरूता परिवारमा अभिभावकको भूमिका निर्वाह गर्ने गरेकी छन् ।
दृष्टिविहीन बुबाआमा, तीन बहिनी र एक भाइलाई विहान–बेलुकी हातमुख जोड्न उनले दैनिकजसो सहयोग जुटाउनुपर्छ । उनको दुई खुट्टा नचल्दा कोठामा रहेको चुल्होमा आगो बोल्दैन । खाना पकाउने, कोठा नजिकै रहेको कालीगण्डकीमा दाउरा संकलनदेखि बिरामी बुबाआमालाई अस्पतालसम्म पु¥याउनुपर्ने निरूताले आर्थिक अभावकै कारण विद्यालयको पोशाक, शैक्षिक सामग्रीलगायत आवश्यक सामग्री खरिद गर्न नसक्दा विद्यालय भर्ना हुनबाट वञ्चित भएकी थिइन् ।
घरायसी समस्याले नियमित विद्यालयमा जान नसके पनि पढाइमा अब्बल रहेकी निरूताको शिक्षादीक्षालाई निरन्तरता दिन म्याग्दी उद्योग वाणिज्य संघका निर्वतमान अध्यक्ष एवम् व्यवसायी जीवनबहादुर विश्वकर्माले अभिभावकत्व ग्रहण गर्दै आइतबार प्रकाश माविमा भर्ना गरिदिनुभएको छ ।
आर्थिक अभावले शिक्षाबाट वञ्चित भएको खबर सुनेपछि विश्वकर्माले निरुतालाई आवश्यक पर्ने पोशाक, शैक्षिक सामग्रीसहित आफ्ना अभिभावकको उपस्थितिमा विद्यालयमा भर्ना गरिदिनुभएको हो । निरुतालाई करीब ६ हजारको शैक्षिक सामग्रीसहित मासिक रु एक हजार नगद उपलब्ध गराउने विश्वकर्माले घोषणा गर्नुभएको छ ।
विद्यालयका प्रधानाध्यापक हरिकृष्ण सुवेदी, सहायक प्रअ लेखबहादु हमाल लगायतको उपस्थितिमा सहयोग हस्तान्तरण गर्दै माध्यमिक तहसम्म निरन्तर सहयोग गर्ने प्रतिबद्धतासमेत विश्वकर्माले व्यक्त गर्नुभयो ।
कार्यक्रममा विद्यालयका प्रधानध्यापक सुवेदीले आर्थिक अवस्था कमजोर भएर विद्यालय उमेरमै बाहिर रहेका विद्यार्थीलाई भर्ना गर्नु शैक्षिक अभियानकै सुन्दर पक्ष भएको बताउनुभयो ।
धौलागिरि गाउँपालिका–७ ताकम रातमाटा स्थायी घर भई हाल पर्वत जिल्लाको जलजला गाउँपालिका लामाखेतमा भाडामा बस्ने दृष्टिविहीन दम्पती जलन र सुस्मिता पनि सहयोगबाट खुशी हुनुभएको छ । (रासस)
