मुस्ताङ, १९ वैशाख । भारतीय प्रधानमन्त्री नरेन्द्र मोदीको मुक्तिनाथ भ्रमणको तयारीस्वरुप परराष्ट्र मन्त्रालय र काठमाडौंस्थित भारतीय दूतावासका अधिकारीहरुले बुधबार मुस्ताङको मुक्तिनाथ क्षेत्रको अवलोकन गरेका छन् ।
परराष्ट्र मन्त्रालयका ‘चिफ अफ प्रोटोकल’ दीपक अधिकारीसहितको १२ जनाको टोलीले मुक्तिनाथ पुगेर अवलोकन गरेको हो । सो अवसरमा मुस्ताङका प्रहरी नायव उपरीक्षक रामहरि पाण्डेले जिल्लाको शान्ति–सुरक्षाको अवस्था र सुरक्षा प्रबन्धबारे जानकारी गराएका थिए ।
मुक्तिनाथ मन्दिरमा दर्शन तथा पूजाको विषयमा पुजारी कृष्णप्रसाद सुवेदीले जानकारी गराएका थिए । भारतीय प्रधानमन्त्री मोदीले मुक्तिनाथमा दर्शनकाक्रममा करिब २५ मिनेट समय व्यतित गर्ने तय गरिएको जनाइएको छ ।
यस्तै, सो टोलीमा आएका डा. जयकुमार ठाकुर र भूपेन्द्र बस्नेतले मोदी भ्रमणका बेला अक्सिजन तथा स्वास्थ्य सेवाको अवस्थालाई चुस्त राख्न आग्रह गरेका छन् । टोली भारतीय वायुसेवा निगम र नेपाली सेनाको दुईओटा हेलिकोप्टरमार्फत् मुक्तिनाथ पुगेको थियो ।
