जेठ ६, काठमाण्डौ । राष्ट्रिय जनता पार्टीका नेता अनिल झाले आफ्नो दल तत्काल सरकारमा जाने वातावरण नबनेको बताएका छन् ।
नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै झाले अहिलेको सरकारलाई अरु दलको आवश्यकता नै नरहेको बताए ।
“कुन सरकारमा जाने ? बहुमतको सरकार छ । नेपाल कम्युनिष्ट पार्टीको पर्याप्त बहुमतसहितको सरकार छ ।” झाले भने ।
राजपालाई सरकारमा लिएर जाने आवश्यका अहिलेको सरकारलाई नभएको उनको तर्क छ ।
भारतका प्रधानमन्त्री नरेन्द्र मोदी नेपाल आउँदा राजनीतिक कुराकानी नभएको झाले दाबी गरे । भ्रमण तालिका नै दुई घण्टा ढिलो भएकोले भेटघाट पनि प्रभावकारी बन्न नसकेको झाले बताए ।
“संक्षिप्त कुराकानी भयो । राजनीतिक कुरा भएन । उहाँ तीर्थयात्रीको रुपमा आउनुभएको थियो ।” झाले भने ।
चुनावमा जितेर प्रदेश नम्बर दुईमा चुनाव सरकार बनाउन सफल भएकोमा मोदीले आफूहरुलाई बधाई दिएको उनले बताए ।
मोदीले सरकारमा सहभागि हुने विषयमा कुनै सुझाब वा दबाब नदिएको झाले दाबी गरे ।
अध्यक्ष मण्डलका संयोजक महन्थ ठाकुर अस्वस्थ भएकाले पार्टी केही कामहरु प्रभावित भएको बताएका छन् ।
पार्टीभित्र कुनै पनि विषयमा विवाद नभएको जिकिर गर्दै झाले ठाकुरको स्वास्थ्य अवस्था सामान्य भएपछि पार्टीको काम कारबाहीले तिब्रता पाउने बताए ।
झाले अब केही दिनमा नै संसदीय दलको नेताको चुनाव गरिने बताए ।
संयोजनक ठाकुर अस्वस्थ भएपछि उपचारका लागि भारत गएपछि दलको नेता चयनमा ढिलाई भएको उनले बताए ।
“अहिले उपचार गरेर आइसक्नुभएको छ । पूर्ण स्वस्थ बन्नुभएको छैन । उहाँ स्वस्थ भएपछि दलको नेता चयन हुन्छ ।” झाले भने ।
दलको नेता को हुन्छ भन्ने कुरा अहिले नै भन्न नसकिने झाले बताए । दलको नेता निर्वाचित सासंदहरुले चयन गर्ने भएकाले अहिले केही भन्न नसकिने उनले बताए ।
प्रतिनिधिसभा सदस्य मस्यौदामा फौजदारी अभियोग लागेका सासंदलाई निलम्बन गर्ने भन्ने विषय आफैमा विवादित भएको तर आफूहरुले विवाद नगरेको झाको भनाई छ ।
“जुन मान्छेलाई चुनाव लड्न दिइन्छ, जितेपछि सांसद हुन दिने कि नदिने ?” झाले प्रश्न गरे । “निर्वाचनभन्दा अघि गरेको कामलाई आधार बनाएर निर्वाचन जितेपछि निलम्बन गर्ने कि नगर्ने ?”
