काठमाडौं, १५ जेठ । नेपाली कांग्रेसका सभापति शेरबहादुर देउवाले जनताको पक्षमा काम गरेर देखाउन सरकारलाई चुनौती दिएका छन् ।
गणतन्त्र दिवसका अवसरमा गणेशमान सिंह तथा जनआन्दोलन शहीद स्मृति शान्ति प्रतिष्ठानले आज काठमाडौंमा गरेको कार्यक्रममा सभापति देउवाले जनतालाई भ्रममा मात्र नपारी काम गरेर देखाउन सरकारलाई चुनौती दिएका हुन् ।
सभापति देउवाले आफैं सर्वेसर्वा हो भन्ने आचरणलाई त्यागी विकासको मूल धारमा उभिन सरकारलाई चेतावनी दिएका छन् । त्यस्तै कार्यक्रममा नेपाल कम्युनिस्ट पार्टीका अध्यक्ष पुष्पकमल दाहालले शान्ति र लोकतन्त्रको विपक्षमा उभिने शाहस अब कसैको नभएको बताएका छन् । उनले सबै दललाई इमान्दारिताका साथ राष्ट्रिय लक्ष्यमा केन्द्रित हुन आह्वान समेत गरे ।
