काठमाडौं, १३ असार : अर्जेन्टिना रसियामा जारी विश्वकप फुटबलको नकआउट चरणमा प्रवेश गरेको छ। मंगलबार सेन्ट पिटर्सवर्ग स्टेडियममा भएको समूह चरणको अन्तिम खेलमा नाइजेरियालाई २ – १ ले हराउँदै अर्जेन्टिना समूह उपविजेता बन्दै विश्वकपको अन्तिम १६ मा पुगेको हो ।
महत्वपूर्ण खेलमा अर्जेन्टिनालाई जिताउन कप्तान लियोनल मेसी र मार्कोस रोजोले समान एक-एक गोल गरे। नाइजेरियाका भिक्टर मोसेसले पेनाल्टीमार्फत गोल फर्काए ।
सम्बन्धित समाचार :
अर्जेन्टिनाको जितमा म्याराडोनाको उत्साह, कहिले अश्लिल हर्कत, कहिले विरामी
आजको खेलमा मेसीले गोल गरेर अर्जेन्टिनालाई अघिल्लो चरणमा पुर्याउने नेम्वाङको दाबी
अर्जेन्टिनाबाट धनिया र ब्राजिलबाट चिनी आयात
खेलाडी सामपाओलीलाई हटाउन चाहन्छन भन्ने हल्लामात्रै : अर्जेन्टिना
लज्जास्पद हारसँगै संकटमा अर्जेन्टिना, यस्तो छ अघिल्लो चरणमा पुग्ने सम्भावना
दबाबमा अर्जेन्टिना, मेसीलाई क्रोएसियाको चुनौति
अत्यान्तै रोमाञ्चक प्रतिस्पर्धाको ८६ औं मिनेटमा रोजोले गोल गर्दै अर्जेन्टिनालाई २-१ को जितसहित नकआउट चरणमा लगेका हुन्। एक एक गोलको बराबरीमा सकिएको भए अर्जेन्टिना समूह चरणबाट बाहिरिने थियो ।
त्यसअघि खेलको १४ औं मिनेटमा मेसीले गोल गर्दै अर्जेन्टिनालाई सुरुवाती अग्रता दिलाएका थिए। विश्वकपमा मेसीको यो पहिलो गोल हो। तर, खेलको ५१ औं मिनेटमा नाइजेरियाका मोसेसले पेनाल्टीमा गोल गर्दै खेललाई बराबरीमा ल्याए।
अर्जेन्टिनाका मस्चिरानोले नाइजेरियाका खेलाडीलाई फल गरेपछि पाएको पेनाल्टीमा मोसेसले सहजै गोल गर्दै १-१ को बराबरीमा ल्याएका थिए।
त्यसपछि दुबै तर्फबाट कुनै गोल भएन र प्रतियोगितामा पहिलो जित निकाल्दै अर्जेन्टिनाले नाइजेरियालाई हरायो। यसअघि पहिलो खेलमा आइसल्याण्डसँग बराबरी खेलेको अर्जेन्टिनाले दोस्रो खेलमा क्रोएसियासँग पराजित भएको थियो।
जितपछि समूह डी को अर्जेन्टिनाले ३ खेलबाट ४ अंक जोड्दै उपविजेताका रूपमा नकआउट चरण प्रवेश गरेको हो। यही समूहको अर्को खेलमा आइसल्याण्डलाई २-१ले हराउँदै क्रोएसिया सतप्रतिशत जितसहित समूह बिजेता बन्यो। समूहबाट नाइजेरिया र आइसल्याण्ड बाहिरिएका छन्।
अब अन्तिम १६ को पहिलो खेलमा अर्जेन्टिनाले असार १६ गते शनिबार समूह सीको विजेता फ्रान्ससँग खेल्नेछ भने क्रो एसियाले उपविजेता डेनमार्कको सामना गर्नेछ। मंगलबार राति भएको खेलमा डेनमार्क र फ्रान्सले गोलरहित बराबरी खेल्दै नकआउट चरण प्रवेश गरेका थिए।
