नेपालगन्ज, १४ असार (रासस) : बाँकेमा निर्माण भइरहेका विकासका योजनाको जिल्ला समन्वय समितिले अनुगमन थालेको छ ।
समन्वय समितिका संयोजक अजयकुमार श्रीवास्तवले संघीय र प्रदेश सरकारबाट स्पष्ट निर्देशिका नआएपछि समिति बैठकले आप्mनो छुट्टै निर्देशिका बनाएर अनुगमन शुरु गरेको हो ।
समितिले जिल्लामा सञ्चालित साना तथा ठूला विकासका योजनाको अनुगमन गर्ने र काममा ढिलासुस्ती, अनियमितता भएको पाइए आवश्यक कारबाहीका लागि सम्बद्ध निकायमा सिफारिश गर्ने उहाँले बताउनुभयो ।
अनुगमन गर्नुअघि जिल्ला समन्वय समितिले संयोजक श्रीवास्तवको नेतृत्वमा समितिका सदस्यहरु चेतबहादुर घर्ती, जानुका क्षेत्री र प्रशासकीय अधिकृत भरतबहादुर मल्लसहितको टोली गठन गरेको छ ।
धान रोपाइँ शुरु
वर्षा भएपछि यस वर्ष जिल्लाका कृषकले धान रोपाइँ शुरु गरेका छन् । जिल्लामा यस वर्ष ३६ हजार ५०० हेक्टरमा धान खेती गर्ने लक्ष्य राखिएको छ । गत वर्ष ३४ हजार ६६५ हेक्टरमा एक लाख नौ हजार २२६ मेट्रिक टन धान उत्पादन भएको थियो ।
जिल्ला कृषि विकास कार्यालयका प्रमुख कृष्ण बस्नेतले डिप बोरिङ, नहर र कुलोको सुविधा भएका ठाउँमा धान रोपाइँ थालेको बताउनुभयो । आकाशे पानीको भरमा धान खेती हुने ठाउँमा भने अहिले बीउ मात्र छरिएको छ ।
जिल्लाको परशपुर, राधापुर, सीतापुर, फत्तेपुर र कचनापुरमा धान रोपाइँ शुरु भइसकेको छ । अधिकांश कृषकले राधा–४ जातको तथा जानकी, हर्दिनाथ, सावित्री, श्यामजीरा, बासमती र रामधान जातका धान खेती गर्दैआएका छन् ।
जिल्लाको खेतीयोग्य भू–भाग ५७ हजार २५२ हेक्टरमध्ये २७ प्रतिशत हेक्टरमा मात्र सिँचाइ पु¥याउन सकिएकाले धान उत्पादनमा सोचे अनुसारको परिणाम आउन नसकेको कार्यालय प्रमुख बस्नेत बताउनुहुन्छ ।
