असार १६, काठमाण्डौ । नेपाल भारत प्रवुद्ध समुह इपिजीका सदस्य निलाम्बर आचार्यले असार महिनाभित्रमा नै दुई देशबीच साझा प्रतिवेदन तयार हुने दाबी गरेका छन् ।
नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै आचार्यले हिजो देखि बसेको समुहको नवौँ बैठकले साझा प्रतिवेदन तयार पार्नमा सहयोग पुर्याउने दाबी गरेका हुन् ।
सम्बन्धित समाचार :
नेपाल–भारत प्रवुद्ध समुहको बैठकमा १९५० को सन्धीका विषयमा गम्भीर छलफल
१९५० को सन्धी समयअनुसार परिवर्तन गर्न भारत सकारात्मक
नेपाल–भारत सम्बन्ध अब नयाँ उचाईमा पुग्छ : भट्टराई
दुई देशबीच भएका समस्याहरुलाई समाधान गर्नका लागि बैठक महत्पूर्ण हुने आचार्यको भनाई छ ।
इपिजीको बैठकले सन् १९५० मा भएको नेपाल–भारतबीचको सन्धीबारे सुझाब मात्रै दिइने आचार्यको भनाई छ ।
इपिजीले दिएको सुझाब अनुसार सरकारले कस्तो कदम चाल्छ भन्ने कुरा महत्वपूर्ण रहेको उनले बताए ।
हिजोदेखि बसेको इपिजीको बैठक आज सकिदैछ । बैठकले प्रतिवेदन बनाएर सरकारलाई हस्तान्तरण गरिने आचार्यले बताए ।
बैठकमा महत्वपूर्ण विषयमा गहन छलफल गरिएको जानकारी दिदै आचार्यले सन्धी, सम्झौता र व्यवहारमा समयअनुसार परिवर्तन गर्नुपर्नेमा प्रतिवेदन केन्द्रित हुने बताए ।
इपिजीलाई प्रतिवेदन तयार पार्न दिइएका दुई वर्षको समय सकिन लागेकाले अब प्रतिवेदन बनाइएने उनले बताए । प्रतिवेदनका लागि अब समय थप्न नपर्ने उनको दाबी छ ।
अहिलेको समयमा १०५० को सन्धी सान्दर्भिक नभएकाले त्यसको पुनरावलोकन गर्नुपर्नेमा आचार्यले जोड दिएका छन् । भारतीय पक्षमा पनि इपिजी बैठकमा पुनरावलोकनका लागि तयार रहेको उनको दाबी छ ।
हिजोदेखि काठमाणडैमा बसेको इपिजीको बैठक आज सकिदैछ ।