स्पेन, २० चैत । बार्सिलोना स्पेनिस ला लिगा फुटबल अन्तर्गत मंगलबार राति भएको खेलमा भिल्लारियलसँग ४(४ गोलको बराबरीमा रोकिएको छ। १० खेलाडीमा सीमित भिल्लारियललाई अन्तिम समयमा दुई गोलले फर्काएपछि बार्सिलोना बराबरीमा रोकिएको हो ।
पहिलो हाफ २-१ को अग्रतामा सकेको बार्सिलोनाले दोश्रो हाफमा ३ गोल खाएको थियो। त्यसपछि ४-२ ले पछि परेको बार्सिलोनाका लागि खेलको ९० औँ मिनेटमा कप्तान लियोनल मेस्सी तथा इन्जुरी समयको तेस्रो मिनेटमा लुइस स्वारेजले गोल गरेर बार्सिलोनालाई हारबाट जोगाए।
८६ औँ मिनेटमा गोन्जालेज दोहोरो पहेँलो कार्ड खाँदै मैदानबाट बाहिरिएपछि भिल्लारियल १० खेलाडीमा सीमित भएको थियो। पहिलो हाफको बार्साको लागि १२ औँ मिनेटमा फिलिप कोन्टिन्हो तथा १६ औँ मिनेटमा माल्कमले गरेका थिए भने २३ औँ मिनेटमा भिल्लारियलका लागि सामुएल चुक्वुवेजले एक गोल फर्काए।
यस्तै भिल्लारियलका लागि ५० औँ मिनेटमा टोको एकाम्बी, ६२ औँ मिनेटमा इबोर्रा तथा ८० औँ मिनेटमा बाक्काले गोल गरेका थिए ।बराबरीपछि शीर्षस्थानमा रहेको बार्सिलोनाले ३० खेलबाट ७० अंक जोडेको छ । एजेन्सीको सहयोगमा
