काठमाडौं, ३० बैशाख । शताब्दी पुरुष संस्कृतविद् सत्यमोहन जोशी वर्तमान प्रधानमन्त्री केपी शर्मा ओलीसँग रिसाएका छन् । शनिबार प्राइम टाईम्स टेलिभिजनबाट प्रशारण भएको जनता जान्न चाहन्छन् कार्यक्रममा पत्रकार ऋषि धमलासँगको कुराकानीमा उनले ओलीसँग रिसाएको संकेत गरेका छन् । प्रधानमन्त्री ओलीले कामभन्दा बढि भाषण गरेको उनको आशय थियो ।
जोशीले सरकारले बोलेका कुरा पूरा गरेर देखाएमात्रै जनता आश्वस्त हुने नत्र निराशा भैरहने पनि टिप्पणी गरे । सरकारले साँच्चिकै चाहने हो भने नेपालमा भ्रष्टाचार समाप्त हुने पनि उनको ठोकुवा छ । उनले भने,”भ्रष्टाचारीलाई कारबाही र दण्डित गर्नुपर्छ । अन्य देशमा भ्रष्टाचार समाप्त भएको छ । हाम्रो देशमा पनि हुन्छ । तर, सरकारले कडा कदम चाल्नुपर्छ ।”
जोशीले आफूले जीवनमा धेरै राजा तथा नेता फटाएको सुनाउँदै सबैभन्दा मनपर्ने राजनेतामा भने राजा त्रिभुवन नै मन परेको सुनाए । उनकाअनुसार राजा त्रिभुवनमा भने देशप्रति औधि माया थियो । उनले देश र जनताको पक्षमा काम गरेको जोशीको बुझाई छ ।
उनले सादा जीवन र उच्च विचार राख्न सबैलाई सुझाए । त्यस्तै, जीवन सधैं चिन्ताबाट मुक्त हुनुपर्ने पनि उनले नयाँ पिँढीलाई सल्लाह दिए ।आफूमा चिन्ता नभएकै कारण आज सय वर्षसम्म बाँच्न सफल भएको जोशीको विश्वास छ । उनले भने,”मेरो उर्जा भनेको नै त्यही हो । म जहिल्यैपनि चिन्ताबाट मुक्त छु ।” जोशीले जीवनलाई लम्बाई र चौडाईले नाप्न नहुने भन्दै बरु गहिराई र उचाईले नाप्नुपर्ने विचार सुनाए ।
