दोलखा, भदौ २० । दोलखाको कालिञ्चोक गाउँपालिका ९ स्थित सुन्द्रावती खोलाले कार बगाउँदा एक जनाको मृत्यु भएको छ । मृत्यु हुनेमा तामाकोसि गाउँपालिका वडा नम्वर ३ जफेका २४ वर्षिय अनिश पोखरेल रहेका छन् ।
कारमा सवार सोही गाउँपालिका ३ का ३१ वर्षिय विकज पोखरेल र चालक रामेछापको लिखु तामाकोसि गाउँपालिका २ का पवन पौडेल घाईते भएका छन् । घाईते दुबै जनाको अवस्था सामान्य रहेको र सदरमुकाम चरिकोट स्थित च्छोरोल्पा अस्पतालमा उपचार भैरहेको प्रहरीले जनाएको छ ।
सिंगटीबाट चरिकोट तर्फ आउँदै गरेको ईकोस्पोट बा १९ च ४३९० नम्वरको कार गएराती साँढे १२ बजेको समयमा सुन्द्रावती खोलाले बगाएको हो । अविरल बर्षसँगै खोला बढेकाले घट्ना भएको स्थानीयले बताउँछन् । जिल्ला प्रहरी कार्यालय दोलखाका ईन्सपेक्टर रेशम बोहोराका अनुसार मृतकको शव पोष्टमार्टमका लागि चरिकोट अस्पताल ल्याईएको छ । खोलामा खसेको कारलाई मेसिन प्रयोग गरी निकाल्ने तयारी भैरहेको स्थानीयले बताएका छन् ।
