काठमाडौं, २२ भदौ । तीन दिने नेपाल भ्रमणका लागि चिनियाँ विदेशमन्त्री वाङ यी आज साँझ काठमाडौं आइपुगेका छन् । उनलाई परराष्ट्र मन्त्रालयका सचिव शंकरदास बैरागीले त्रिभुवन विमानस्थलमा स्वागत गरेका हुन् ।
परराष्ट्रमन्त्री प्रदीप ज्ञवालीको औपचारिक निमन्त्रणामा १९ सदस्यीय टोलीको नेतृत्व गर्दै वाङ नेपाल आएका हुन् । वाङ पाकिस्तानको राजधानी इस्लामावादबाट विशेष विमानमा भारतीय आकाश हुँदै काठमाडौं आइपुगेका हुन्। मौसम खराब हुँदा चिनियाँ विदेशमन्त्री वाङ यी चढेको विमान केही समय आकाशमै होल्ड भएको थियो ।
वाङको राजनीतिक भेटवार्ता सोमबारदेखि मात्रै सुरू हुनेछ। पराराष्ट्रमन्त्रीहरूको प्रतिनिधिमण्डलको बीचमा वाङसँग औपचारिक वार्ता हुनेछ। वार्ता विशेषगरी नेपाल-चीनबीच आर्थिक तथा विकास साझेदारीलाई कसरी अगाडि बढाउन सकिन्छ भन्ने विषयमा बढी केन्द्रित हुने बताइएको छ।
तस्विर : मुकुन्द कालिकोटे/रिपोर्टर्स नेपाल डटकम
