काठमाडौं, भदौ २८ । बजारमा अहिले सुनको भाउ आकाशिएको छ । अब अधिकांश सामान्य नेपाली जनताका लागि सुन सपना बन्ने अवस्था बनेको छ । सुनको भाउ बढिरहँदा लसुनको भाउ बढेर चुल्होको खर्च महङ्गो भएको छ ।
औषधी समेत मानिने लसुनको मूल्य प्रतिकेजी २५० रुपैयाँ सम्म पुगेको छ । सुकेको नेपाली लसुनको जतिकै मूल्य हाइब्रिड चाइनिज लसुनको मूल्य रहेको छ ।
कालिमाटी तरकारी तथा फलफूल बजार विकास बोर्डको आजको मूल्य अनुसार हरियो लसुन प्रतिकेजी २१० रुपैयाँ सम्म पुगेको छ । लसुन नेपालीको भान्छामा अत्यावश्यक तरकारी तथा मसला हो । हरियो लसुन तरकारीका रुपमा प्रयोग हुन्छ भने सुकेको लसुन मसलाका रुपमा प्रयोग हुन्छ ।
लसुनको मूल्य आकाशिंदा उपभोक्ता मारमा परेका छन् । देशभित्र उत्पादन बढ्न गई चाइनिज लसुनको दबदबा बढेको छ । तर, नेपाली स्थानीय लसुनको तुलनामा चाइनिज लसुन पौष्टिक दृष्टिले प्रभावकारी हुँदैन ।
