नेपालमा हिन्दु राष्ट्रको बहस चर्कदै गर्दा हिन्दुवादी संस्था राष्ट्रिय स्वयं सेवक संघका प्रमुख मोहन भागवतले नेपालको व्यवस्था नेपाली जनताले तय गर्ने बताएका छन् । मंगलबार दिल्लीमा छानिएका विदेशी पत्रकारहरुलाई बोलाएर पत्रकार सम्मेलन गर्ने क्रममा नेपाली पत्रकारहरुको प्रश्नमा उनले यस्तो जवाफ दिएका हुन् ।
‘नेपालको राजनीतिक व्यवस्था नेपाली जनताले तय गर्ने हो, पहिलोपटक विदेशी पत्रकारलाई बोलाएर पत्रकार सम्मेलन गरेका आरएसएस सरसंगचालक भावगतले भने,’ हामीलाई नेपालका बारे सुझाव दिने अधिकार छैन । हिन्दु धर्मालम्बीहरु नै वास्तविक धर्मनीरपेक्ष रहेको उनको तर्क थियो । हिन्दुले अर्को धर्म मान्नेको पनि सम्मान गर्ने गरेको उनको भनाई थियो ।
दक्षिण एशियामा एउटै राज्य बनाउने आरएसएसको मुख्य उद्देश्य रहेकोबारे सोधिएको प्रश्नमा उनले त्यसको खण्डन गरे । उनले भने, ‘दक्षिण एशियाको इतिहासमा कहिले एउटा राज्य रहेन र यसको कल्पना पनि छैन ।’ यस क्षेत्रको समाज एकतावद्ध होस् भन्ने आफूहरुको उद्देश्य रहेको बताए । उनले भने, ‘व्यवहारिक धरातलमा दक्षिण एशियामा मिलेसम्म खुल्ला सीमाको अभ्यासका लागि प्रयास हुनुपर्छ ।’
कार्यक्रममा ३० देशका ५६ मिडियाबाट ९३ जना पत्रकारहरु सहभागी थिए । आरएसएस प्रमुख मोहन भागवतले एक सय वटा प्रश्नको जवाफ दिएका थिए ।
भारतको सत्तारुढ दल भारतीय जनता पार्टीको नजिक रहेको आरएसएस विश्वकै शक्तिशालीमध्येको संगठन मानिन्छ । भाजपाका सबैजसो प्रभावशाली नेताहरु आरएसएसबाट प्रशिक्षित भएर राजनीतिमा आएका हुन् । भारतका प्रधानमन्त्री नरेन्द्र मोदी पनि आरएसएसको कार्यकर्ता थिए ।-एजेन्सी Photo Source: DNA India
