सामाजिक सञ्जाल फेसबुकमा नायक दिपकराज गिरीले गुनासो पोखेका छन् । उनले आफ्नो आउँदै गरेको चलचित्र “छ माया छपक्कै” लाई लिएर च्यारिटी सो नगर्न अनुरोध गरेका हुन् ।
उनले फेसबुकमा “छ माया छपक्कै को नाममा असोज २४ गते केही हलहरूले च्यारिटी सोहरू गर्न लागेको सुन्नमा आएकोले कृपया यस्ता सोहरू निर्माताको अनुमति बिना नगर्नु हुन सम्बन्धित सबैमा हार्दिक अनुरोध गर्दछौ ।” भनेर लेखेका छन् ।
राजनीतिक द्वन्द्वले प्रेममा पार्ने प्रभावको कथा बोकेको चलचित्रको लिड नायकसँगै पटकथाकार पनि हुन् दिपक । उनले निर्र्मातालाई खबर नै नगरी चारिटिका नाममा सोहरू गरिनु गैर कानुनी रहेको र आफुलाई त्यस विषयमा कुनै खबर नै नरहेको जनाएका छन् । उनको कुरालाई धेरैले सहमति जनाउँदै आफ्नो सम्पत्तिमाथि कसैले अनुमति बिना मनोमानी गर्न नपाउने विचार व्यक्त गरेका छन् ।
दीपेन्द्र लामाको निर्देशनमा निर्माण भएको चलचित्रलाई रोहित अधिकारीले निर्माण गरेका हुन् । दीपाश्री निरौला निर्देशन सल्लाहकारको रूपमा रहेकी चलचित्रमा दीपकराज गिरी, केकी अधिकारी केदार घिमिरे, जितु नेपालका अलावा सुपुष्पा भट्ट, अनुराग कुँवर, प्रकाश घिमिरे, रमा थपलिया, विष्णु सापकोटा लगायतका कलाकारहरूको अभिनय रहेको छ । Photo Source: Deepak Raj Giree Instagram
