काठमाडौं, १३ असोज । ठेकेदार कम्पनी, तारकेश्वर नगरपालिकाका पदाधिकारी, कर्मचारी र सडक विभागको गैरजिम्मेवारीका कारण तारकेश्वर सडकखण्ड अलपत्र परेको छ ।
सडक निर्माण सुरु भएको वर्षौंसम्म पनि निर्माण कार्यमा ढिलाइ हुँदा तारकेश्वर नगरपालिकाका लाखौं सर्वसाधारण हैरानी भोग्न बाध्य छन् ।
नगरपालिकामा निर्माणाधीन शेषमती–सानोपुल–सनफ्लावर स्कुल–बोहोराटार सडकखण्ड र अष्टनारायण–शेषमती–लामबगर–काभे्रस्थली सडकखण्ड निर्माण सुरु भएको लामो समयसम्म पनि अलपत्र अवस्थामा छ । समयमै सडक निर्माण नहुँदा घामलाग्दा धुलो र पानी पर्दा धुलोको समस्याले स्थानीय आक्रान्त बन्न गरेका छन् ।
शेषमती–बोहोराटार सडकखण्ड नगरपालिकाको योजनामा सञ्चालित आयोजना हो भने र अष्टनारायण–काभे्रस्थली केन्द्रीय योजनाअन्तर्गत सडक विभागको योजना हो ।
नगरपालिकाको मुख्य प्रवेशद्वार र चक्रपथ नजिक पर्ने यी महत्वपूर्ण सडकखण्ड विभिन्न बहानामा अलपत्र बन्दै आएका छन् ।यस सडकखण्डको निर्माण गत असार मसान्तसम्ममा सम्पन्न भइसक्नुपर्ने थियो ।
समयमा काम सम्पन्न नभएपछि नगर कार्यपालिकाको बैठकबाट ६ महिना समय थप गरिएको नगरपालिकाले जनाएको छ । स्थानीयको अवरोध तथा सिमाना विवादका कारण समेत समयमा सम्पन्न हुन नसकेको नगरपालिकाको दाबी छ ।
अहिले सो बाटोको मर्मत थालिए पनि गति भने लिन सकेको छैन । आजको राजधानी दैनिकमा केशवप्रसाद पाण्डेले खवर लेखेका छन् ।
