काठमाडौं, १९ कात्तिक । नेपाल कम्युनिष्ट पार्टीका अध्यक्ष प्रचण्डले प्रधामन्त्री बन्ने हतारो देखाइरहेका छन् । वेटिङ प्राइमिनिष्टरका रुपमा लिइएका उनले प्रधानमन्त्री बन्ने हतारो अभिव्यक्ति र भूमिकाबाट देखाउँदै आएका हुन् ।
यसपटक उनले प्रधानमन्त्री बन्ने हतारो मुखरित गरे । मंगलबार नेपालगञ्जमा पुगेर उनले आफू ढिलोचाँडो फेरि प्रधानमन्त्री बन्ने बताए । उनले आफूलाई प्रधानमन्त्री बन्दै गरेको बुझ्न सन्देश दिनेगरी बोल्दै आउँदा पछिल्लो समय दिएको अभिव्यक्तिलाई अर्थपूर्ण मानिएको छ ।
प्रचण्डले नेकपाका अर्का अध्यक्ष केपी शर्मा ओलीसँग सरकारको नेतृत्वका लागि आलोपालो सहमति गरेको बोलिसकेका छन् । यसले राजनीतिकवृत्तमा तरंग ल्याएको थियो । पश्चिम नेपालमा पुगेर उनले आफू प्रधानमन्त्री बन्ने दाबी गरे ।
प्रधानमन्त्री केपी शर्मा ओलीको स्वास्थ्यमा समस्या आइरहेकाले पद छाड्न नेकपाभित्र दबाब बढाइँदा प्रचण्डको पछिल्लो भनाई आएको हो । मृगौलामा समस्याका कारण ओलीको नियमित डायलसिस चलिरहेको छ । जसका कारण मन्त्रिपरिषद् बैठकमा समेत असर पर्ने गरेको छ ।
ओलीको दुई वर्षे कार्यकाल पूरा हुन अब तीन महिनामात्र बाँकी छ । दुई वर्षे कार्यकाल नजिकिदै जाँदा प्रचण्डले प्रधानमन्त्री बन्ने हतारो देखाइरहेका छन् । उनले बेला बेलामा ओलीलाई दबाब दिने अभिव्यक्ति दिइरहेका छन् । रणनीतिक चार्तुयता देखाउनसक्ने प्रचण्डले आफूले जहिले पनि जोखिम उठाउने गरी कदम चाल्ने बताउने गरेका छन् । उनले यस्तै गर्दै पनि आए । प्रचण्डले ढिलोचाँडो प्रधानमन्त्री हुने बताएर त्यसका लागि जोखिम उठाउनसक्ने सन्देश समेत दिइरहेका छन् । File Photo
