काठमाडौं, मंसिर १४ । नेपालले घरेलु मैदानमा जारी १३औं दक्षिण एसियाली खेलकुद सागको भलिबलमा शुक्रबार महिलातर्फ सेमिफाइनलमा स्थान बनाउँदा पुरुष टोली भने समूह चरणबाटै बाहिरिएको छ।
त्रिपुरेश्वरस्थित राष्ट्रिय खेलकुद परिषद् राखेपको कभर्डहलमा पुरुषततर्फ शुक्रबार भारतसँगको पराजयसँगै नेपालले समूहका कुल दुई खेलमै हार बेहोर्दै लिग चरणबाटै यात्रा टुङ्गाउँदा महिला टोलीले सेमिफाइनलमा स्थान बनाएको छ। नेपाली महिला टोलीले शनिबार श्रीलंकाविरुद्ध सेमिफाइनलमा चुनौती प्रस्तुत गर्दैछन्। समूह ‘ए’ मा नेपालको पुरुष टोलीले लिगका दुई खेलमै हार बेहोरेको थियो।
शुक्रबार भारतविरुद्ध ३–० को सोझो सेटमा पराजय बेहोरेपछि नेपाली पुरुष टोली गत वर्ष जस्तै यस संस्करणमा पनि लिग चरणबाटै यात्रा टुङ्गाउन बाध्य भयो। नेपालले भारतसँग २५–१५, २५–१३ र २५–१६ ले सहजै हार बेहोरेको थियो। गत बुधबार बंगलादेशविरुद्धको खेलमा अप्रत्यासित हार बेहोर्नु नै नेपालको पुरुष टोलीका लागि घातक साबित भयो।नागरिक दैनिकबाट
