काठमाडौँ, २४ मंसिर । नेपालमा जारी १३ औं दक्षिण एसियाली खेलकुद सागका पदकधारी खेलाडीलाई प्रदेश ३ सरकारले पुरस्कार घोषणा गरेको छ ।
प्रदेश ३ को सोमबार बसेको मन्त्रिपरिषद् बैठकले सागमा पदक विजेता खेलाडीलाई नगदसहित सम्मानित गर्ने निर्णयका साथै विभिन्न पाँच निर्णय गरेको प्रदेश ३ का आन्तरिक मामिला तथा कानुनमन्त्री शालिकराम जमरकट्टेलले जानकारी दिए । बैठकले स्वर्ण विजेता खेलाडीलाई जनही एक लाख, रजत विजेतालाई जनही ५० हजार र कांस्य विजेतालाई जनही २५ हजारसहित सम्मान र प्रोत्साहन गर्ने निर्णय गरेको मन्त्री जमरकट्टेलले बताए ।
उनका अनुसार उक्त सम्मान र प्रोत्साहन प्रदेश ३ मा स्थायी रूपमा बसोबास गर्ने खेलाडीको हकमा मात्र लागू हुनेछ । साग प्रतियोगिता काठमाडौं, पोखरा र जनकपुरमा भइरहेको छ ।
कान्तिपुर दैनिकबाट
